Vawiin chawhnu dar 1.00 khan Rural Development Minister Pu R. Lalzirliana Chairman-na hnuaiah State Level Vigilance & Monitoring Committee chu Secretariat Conference Hall-ah an thukhawm a; hetah hian Pu C.L. Ruala, MP (LS), Minister Pu S. Hiato, Minister Pu P.C. Lalthanliana, Parliamentary Secretary Pu Lalrinmawia Ralte, Pu Lalduhoma, MLA, Pu K. Liantlinga MLA te bakah Department hrang hrang aiawh Officer-te an kal kim hle a ni.
He meeting-ah hian Mahatma Gandhi National Rural Employment Guarantee Act (MGNREGA) kalphung te, Mizoram sum mamawh zat leh pawisa hmuh tawh dan te, sawrkar hnathawk awmna chhungkua a job card pek leh pek loh chungchang te, inhlawhna pawisa sem dan chungchangte, he scheme hnuaia hmalakna tih zauh belh dan chungchangte leh thil pawimawh dangte sawiho a ni.
MGNREGA hi Mizoram-ah chuan 2nd February 2006 atangin Saiha leh Lawngtlai District-ah bultan a ni a; kum 2007-08 ah Champhai leh Lunglei District-ah te tan a ni ve leh a. Kum 2008-09 atang khan Aizawl, Mamit, Kolasib leh Serchhip District te huaptir a ni ve ta a ni. Kum 2011-12 chhunga he scheme hnuaia Mizoram pawisa hmuh tura Central sawrkarin a pawmpui chu cheng nuai 40605.612 a ni a; hetah hian Central sawrkar tum tur chu cheng nuai 36774.888 a ni a; Mizoram sawrkarin a do-letna tur chu cheng nuai 3830.726 a ni.
