Vawiin khan IPR Conference Hall-ah Consultative Committee on Nation Wide Amla Campaign neih a ni. He hun hi Pu Lalrinliana Sailo, Health & Family Welfare Minister in a hmanpui a, Pu Vanhela Pachuau, IAS, Chief Secretary-in inkhawm hi a kaihruai a ni.

 

 

Minister chuan medicinal plant thil ah hian department hrang hrangte an thawh ho that a ngai a, department te chuan an thiamna bik te hmang tangkai a, damdawi tha tak a chhuah ngei a beisei thu a sawi a, sawrkar laipui atanga project kan hmuhte hi a tawp thlenga tha taka ti zel turin Minister chuan a fuih bawk. Vawiin meeting hian Mizoram tan rah tha tak a chhuah a beisei thu Minister chuan a sawi.

Pu T.U. Haqqi, Assistant Adviser (Botany), National Medicinal Plants Board, Govt of India chuan Amla (sunhlu ) hriselna atan a that dan hrang hrang a sawi a, Dr. N. Pallai, Director of Health Services in  Nation Wide Amla Campaign lo intan dante a sawi. Dr. HB James, Programme Officer (State Medicinal Plants Board)  Health Services leh Pu Samuel Rosanglura, Director, Horticulture ten Nation Wide Amla Campaign chungchang leh Mizoram a National Mission on Medicinal Plants chungchang hrilhfiahna hun an hmang bawk.

National Medicinal Plants Board chuan sunhlu hi hriselna atan a thatzia hria in India  ram pumah inhrilhhriatna leh chin uar nise tih a rel a, hemi denchhen hian he inkhawm hi buatsaih a ni.