No.6358/2020-2021

Kolasib 26th October, 2020: Vawiin chhun khan Kolasib Bawrhsap pisaah ‘Covid-19 No Tolerance Fortnight’ bawhzui a ruahmanna hrang hrang siam te sawihona hun neih a ni a, Dr. H.Lalthlangliana, Bawrhsapin hun hi kaihruaiin District Medical Officer, District Medical Superintendent, Senior Medical Officer , Addl. SP, DIPRO, SDC-te leh President, Sub-Headquarters YMA, Kolasib district-te an tel a ni.

Dr.H.Lalthlangliana chuan,”Contact Tracing hi Covid-19 darh zel tur ven nana kan ralthuam pawimawh tak a ni,” tiin Contact Tracing ngaite chuan thuneitute hnenah an kalkualna kimchang takin an thlen thin a pawimawh thu a sawi a,” Contact tracing chungchanga kan mawhphruhnate hlenchhuah hi covid-19 kan do let ve theihna a ni” a ti bawk. Bawrhsap chuan Covid-19 chungchanga sawrkar inkaihhruainate chu uar zawk a inzirtirna kalpui chhunzawm a tul thu sawiin hemi kawngah hian VLTF-te nen a thawhhona tha neih a pawimawh thu a sawi a, khaw hrang hrangah aurinna hmanga Covid-19 chungchanga invenna leh fimkhur a ngaihna lai puan tam a tul thu a sawi bawk a ni.

Covid-19 No Tolerance Fortnight chhunga Kolasib District-a inkaihhruaina hman tur siamte chu sawiho a ni a, a hnuai a tarlan bakte chu kal danphung pangngai ang a kalpui tur a ni.

1. Kolasib District chhunga zirna in - School, College leh Educationa/Coaching Institute-te chu khar lailawk tur a ni a. Hostel-a awm tawhsa te chu an awm tlang thei ang a, luh (admit) thar erawh phal a ni lo.

2. Inkhelh emaw Games & Sports Tournament huaihawt khap tlat a ni a. Sports practice-naah mi 10 (sawm) aia tam punkhawm phal a ni lo.

3. Gym, Picnic spot leh Intawllenna hmun dangte hawn phal a ni lo.

4. Cinema Hall, Auditorium, Community Hall, adt. te hawn phal a ni lo.

5. Mitthi vuina leh inneihna (man hlan/ inneih inkhawm leh reception)-ah te mi 35 (sawmthum panga) chin punkhawm phal a ni. Lungphun, anniversary, pawl thil a kalkhawmna, lehkhabu tlangzarh adt. ah chuan mi 20 (sawmhnih) aia tam punkhawm khap a ni. Heng hmuna telte chhinchhiahna kimchang (hming, address, phone number leh kal hunte) ziahna bu Register chu a huaihawttu ten an vawng tur a ni.

6. VC/VLTF/YMA -ten mahni veng/khuaah “Tlangau” in nitin vawi thum COVID-19 chungchanga invenna leh fimkhurna turte duansa angin an puangzar thin ang.

7. Situation Report/ Status Updated Report hi District Magistrate hnenah nitin tlai dar 5 (nga)-ah Zonal Magistrate-ten prescribed format duansaah Online (Whatsapp) hmangin hemi number 8974761551-ah hian an report ang.

THUPEK KENKAWH LEH HREMNA DAN:
He thupek hi mipui vantlangin an zawm that leh that loh endik kawngah Disaster Management Act, 2005 in thuneihna a pek District Authority leh The Mizoram (Containment & Prevention of the spread of COVID -19), Act 2020 in thuneihna a pek — Chairman / Vice Chairman / Member Secretary, State Level Task Force, Executive Magistrates, Police Officer Constable chin chunglarn, Chairman / Vice Chairman / Member Secretary, LLTF/VLTF-te leh a bik a Sawrkar hnathawk COVID-19 Executive Duty atan a ruatten khauh taka kengkawhin an endik thin ang.