Tea Board, Ministry of Industries & Commerce, Government of India leh Mizoram Horticulture Department tangkawpin Mizoram hmun hrang hranga Thingpui (Tea) chingtu te tana an buatsaih Convention of Small Tea Growers of Mizoram ni 2 awh tur chu vawiin khan Industries Minister Pu S.Hiato chuan Horticulture Directorate Conference Hall ah a hawng. He Conventiona thingpui chingtute training pe tur hian Pu Roy Choudhury, Tea Board Adviser, Pu Rakesh Saini, Executive Director, Tea Board, Dr Ramesh Baruah, Advisory Officer, Dr S.C.Baruah, HOD, Assam Agriculture University, Pu K.C.Baishiya, Asst. Director, Tea Board leh Dr S.Samigeahi, Advisory Officer te an lo kal a ni.

Tea Board Adviser Pu Roy Choudhury chuan Mizorama thingpui chin chu tam tham lo mah se a ram leilung leh boruak te thingpui that duhna tih hriatchian a nih avangin thingpui chingtu te chu tan la sauh sauh turin a fuih a, an mamawh te pawh Tea Board-in a ngaihtuah sak zel tur thu a hrilh bawk. Thingpui fe siam nan khawl lian hman ni lo mah se chhungkaw mamawh phuhru tawka thingpui fe herchhuah te chu a tui zawkin a man pawh a to duh zawk a ni, a ti.

He Conventiona Khualzahawm Pu Rakesh Saini, Executive Director, Tea Board chuan thingpui chu tuchhuan thlenga rochun theih thlai dam rei thei tak a nih thu sawiin ram sik leh sa danglam tur ven nan te, ramhmul thing tha tak tak te humhalh nan te a that thu leh eizawn nana tha tak a nih bawk avangin thingpui chu uar zawka Mizorama chin ni thei se a duh thu a sawifiah a, Mizoramah Tea Board Office hawn tum a nih thu a puang bawk.

Khuallian Minister Pu S.Hiato chuan Mizoramah khaw engemaw zatin thingpui chinga eizawn nana mi tam takin an hman tawh thu sawiin NLUP crops zingah pawh telh a nih thu a tarlang a. Thingpui chingtu te chuan an thingpui fe siam te uluk tak leh thianghlim leh tui taka siam turin a chah a, thingpui tui leh tui lo te chu a into hleih em avangin quality tha taka siam tum turin a chah bawk. Tunhma lam chuan Industries Department hnuaiah thingpui chin chu enkawl thin a nih thu sawiin tunah chuan thingpui chingtu te duh angin thingpui chin dan technology neitu Horticulture Department hnuaiah dah a nih tak thu te a sawifiah bawk.

Convention hmanga thingpui chingtu kalkhawm te pawhin an mamawh thlen theihna tur Tea Board an lo kal chu lawmawm an tih thu an sawi ve bawk a ni.