Central Sorkar Department Media Unit hrang hrang leh State sorkar Depart thenkhatte intelkhawmna, Inter Media Publicity Co-ordination Committee (IMPCC) chu vawiin khan Forest Department Conference Hall-ah an thukhawm.

Vawiin meeting ah hian Department hrang hrang All India Radio, Aizawl leh Lunglei, Doordarshan Kendra, Army Recruiting Office, Forest, Agriculture, AH&Vety, Press Information Bureau, Directorate of Field Publicity leh Health & Family Welfare Department te an tel a, February thla IMPCC thupui “Kangmei laka inven” tih hmanga Department hrang hrang hmalak dan an sawiho a, February ni 6 – 8 chhunga Champhai District khaw 3 – Khawbung, Zawlsei leh Dungtlanga Sorkar laipui hmalakna hrang hrang puanzarna, Bharat Nirman Flagship Programme Public Information Campaign neih zawh tak leh February ni 21 – 23 chhunga Lunglei District khaw 3 – Buarpui, New Khawlek leh Dengsur-a PIC neih zawh tak chungchang an sawiho bakah, March ni 6 – 8 chhunga Aizawl District khaw 3 – Ratu, Lungsum leh Sailutar-a PIC neih tur chungchang pawh an sawiho bawk. Forest Department NLUP hnuaiah Mau chingtu chhungkaw 1,200 awmin, an vaiin cheng nuai 1 pek an nih tawh bakah, NLUP 2nd phase-a 1st installment pawh pek an nih tawh thu vawiin meeting-ah hian tarlan a nih bakah, naktuk February ni 27-a Mizorama Bamboo Day vawihnihna neih a nih tur thu leh hetah hian Mau chi 20 chuang phochhuah tum a nih thu pawh tarlan a ni bawk. Mizo thalai tam zawk army-a an luh theihna turin post ruak uar zawka puanzar theih ni se tha an tih thu IMPCC meeting hian an sawiho bawk.

Vawiin meeting hi an Chairman, PIB leh Doordarshan News hotu ni bawk, Pu Mangjangam Touthang-in a kaihruai a, March thla IMPCC thupui atan “Ramkang ven leh ramngaw humhalh (Environment protection and prevention of fire)” tih an thlang a, IMPCC hi March ni 26-ah Forest Department Conference Hall-ah an thukhawm leh dawn a ni.