3387/2024-2025

Aizawl, the 05th December 2024 :  Vawiin khan State Institute of Rural Development (SIRD) Campus, Durtlang, Aizawl-ah State Level Campaign - “Cooperation Among Cooperatives” chu Cooperation Minister Pu PC Vanlalruata chuan a hawng a.  ‘Cooperation among Co-operatives’ tih thupui hmanga Standard Operating Procedure (SoP) buatsaih pawh Campaign hawnna ni pah fawmin a tlangzarh nghal bawk.

Cooperation Minister Pu PC Vanlalruata chuan  thingtlang hmasawnna turin cooperative movement a pawimawh thu a sawi a. Mizoramin cooperative coverage huang zauh theihna nasa tak a nei tih a sawi a, tunah hian coverage 4% vel a ni a, hmarchhak state dangah chuan 12-26% vel daih a ni a ti. Minister hian Ministry of Cooperation hnuaia hmalakna eng emaw zat a tarlang a, chungte chu ram pumah Multipurpose Primary Agricultural Cooperative Society (MPACS) nuai 2 chuang din a nih dan te, Mizoram chhunga thingtlang  khaw 750 ah te a vawikhatna atan MPACS din tura hmalak a nih dan te a tarlang a ni. "Sahkar se Samriddhi" (Prosperity through Cooperation) hmathlir tihlawhtling turin stakeholder-te chu thawhhona tha tak nei turin a chah bawk.

Pu Liangsangzuala, Joint Secretary, Department of Cooperation, Pu John LT Sanga, Registrar of Cooperative Societies (RCS), Ms. Pankaja Borah, General Manager/OIC, NABARD, Mizoram leh Pu A Lallungmuana, Mizoram Cooperative Apex Bank (MCAB) CEO ten  thingtlanga sum thawhchhuah theihna kawng hrang hrang zingah Cooperative Sector pawimawhna te an sawi a.

He hunah hian Pu T Guite, DGM, NABARD, Mizoram  chuan Cooperative among Cooperative chungchang leh hmalam pan dan tur ruahmanna te Power Point Presentation hmangin a sawifiah a.  He Campaign pawimawh tak tih hlawhtlin a nih theih nana stakeholder-te mawhphurhna leh pawimawhna te sawi bawk.

Kum 2025 hi International Year of Cooperatives-a puan a nih tawh avangin he campaign hian Mizoram chhunga cooperative sector tan hmalakna ti chak leh zual turin awmzia a neih  theih beisei a ni.

‘Cooperation Among Cooperatives’ hawnna program hi NABARD, Mizoram Regional leh Registrar of Cooperative Societies (RCS) Office, Government of Mizoram tangkawpin an buatsaih a ni. Pi  Pankaja Borah, General Manager/OIC, NABARD, Mizoram chuan inlawmna thu leh thuhmahruai sawiin program tan a ni a.  Hunah hian NABARD,  Mizoram sawrkar leh PACS functionary-te senior official dangte an tel a ni.