3388/2024-2025

Dated Aizawl: 05 December 2024: Vawiin khan Sialsuk khua chuan  India ram pum huapa - Best Tourism Village, Community Based, 2024 lawmman an dawn chu khawtlangin ruai nen an lawm a. He hun hi Tourism Minister Pi Lalrinpuii chuan khuallian niin a hmanpui a, Aizawl South 3 bialtu MLA, Baryl Vanneihsangi chu khual zahawm a ni. 

 Khuallian Minister Pi Lalrinpuii chuan thusawiin- Kalphung thar hnuaiah chuan Tourism lamah hmasawnna thar a thlen  chhoh mek zeldan te a tarlang a. Event huaihawt lamah pawh mipui ten hma hruaiin, Sawrkar chu a fual lai dawmtu (facilitator) ah zawk a tang chho mek tih sawiin, event te pawh Sawrkar department in huaihawt tawh lovin, tender hmangin mithiam zawkte hnenah outsourced a nih tan tak thu a sawi a. Sialsuk khua in India ram pum huapa Best Tourist Village - Community Based Tourism lawmman an dawng thei chu khaw mipui leh khawtlang hruaitute thawhhona tha vang a nih thu sawiin, chhuanawm a tih thu a tarlang a. Sialsuk khua chu khualzin ten tlawh an chak bucket list ah telh a nih ngei theihna tura theihtawp chhuahpui turin khawtlang mipuite chu  a sawm nghal bawk a ni.

He hunah hian Khualzahawm Pi Baryl Vanneihsangi Tlau pawhin, thinlung taka Sialsuk khawtlvang a lawmpui thu sawiin, Award Tam zawk dawng thei tur khawpa hma la chho zel a, tangrual zel turin khawtlang mipuite a fuih nghal bawk.

Khawtlang huapa hun hman hi Sialsuk VCP Pu R. Lalruatkima chuan  a kaihruai a. Dr Lalrozama, IAS Secretary, Tourism Department pawhin Department aiawhin lawmpuina thu a sawi nghal bawk a. Zai thiam tak takte zai ngaihthlak niin, Sialsuk khuaa sikul hrang hranga Zirlai naupang ten hnam lam leh zai te entirin, hlim takin hun an hmang a ni.

Best Tourist Village lawmna programme zawh hnu hian Tourism minister, Health Department changtu ni bawk Pi Lalrinpuii chuan Sialsuk PHC pawh tlawhin, Khawtlang hruaitute nen PHC tih changtlun dan tur kawng hrang hrangte an sawiho nghal bawk a ni.