3389/2024-2025

2024 Pawltlak thla ni 5: Vawiin khan DHO Meeting Hall, Lungleiah Lunglei District-a kut hna thawktute leh Agriculture leh Horticulture Department official-te tan Central Integrated Pest Management Centre (CIPMC), Aizawl chuan National Pest Surveillance System (NPSS) mobile app hman dan training an buatsaih.

NPSS app hi buh leh thlai tichhetu rannung leh natna hrikte laka buh leh thlaite venhim a nih theih nana Department of Agriculture & Farmers Welfare (DA&FW) hma laknaa duan a ni a. He mobile app hi tunlai thiamna chhuak thar ber ber leh Artificial Intelligence hmanga thuam niin, rannung leh natna hrik en thlithai, hmuh chhuah leh tihrem nan te hman theih a ni dawn a. He app-ah hian buh leh thlai tichhetu rannung leh natna hrik chungchang, a hriat chhuah dan, enkawl dan leh hriat tur pawimawh tak tak awmin, kut hna thawktute tana thurawn ṭangkai tak tak thawn chhuah nan te pawh hman a ni dawn a. Kut hna thawktute'n awlsam taka an hman theih tura duan niin, Android phone hmangte tan Playstore aṭangin leh iOS hmangte tan App Store aṭangin download theih a ni.