3390/2024-2025

2024 Pawltlak thla ni 5: Vawiin khan Lunglei Municipal Council (LMC) hnuaia Traffic and Transport Co-ordination Committee (TTCC) chu an Chairman, LMC Vice Chairman Pu K. Lalrinawma hovin BoC Hall, Convention Centre, Lungleiah an ṭhu khawm.

He meeting-ah hian LMC leh Local Council (LC) te'n lirthei felfai zawka dah a nih theih nana garage nei lote tana veng chhung kawng dunga 'Parking' leh 'No Parking' an siam chu zawm a nih leh nih loh hriat chian nan leh parking area-a park lote chungah dan anga hma lak a nih theih nan endikna kalpui ni se, tih a ni a. TTCC member-te'n traffic police te nen ṭang tlangin bawhzui ni se, tih a ni.

Kumin Krismas leh kum thar inbuatsaihnaah lirtheia chetsual theihna hrang hrang lakah mipuite an him zawk theih nan leh lirthei document fel lote dap chhuah a, fimkhur zawka lirthei khalhtute'n an khalh a, chetsualna laka an him theih nan 'No Tolerance Day/Week' hman ni se, tih a ni a. Lunglei Traffic Police te'n checking an neih theih nan leh thuchhuah siam turin SP Lunglei hnenah ngenna thlen ni se, tih a ni.

Passenger phur lirthei sumo, taxi, two wheeler taxi, auto rickshaw, etc. hnenah TTCC angin fimkhurna tura thuchhuah siam ni se tih niin, ruihtheihthil avanga chetsualna thlengah driver chungah leh motor permit chungchang thlenga hremna lek kawh dan tur sawi ho a ni bawk a. Zan rei tak tak thlenga rui chunga two wheeler khalh ṭhin, veng chhung tana bengchheng leh hnawksaka chete endik thin ni se, Traffic Police te'n hma lakna lo kalpui se, tih a ni bawk.