3391/2024-2025

5th December, 2024: 5.12.2024 (Ningani) khan School Education Minister Dr Vanlalthlana chuan Union Education Minister Dharmendra Pradhan chu a pisa-ah a hmu a, School Education leh Higher & Technical Education Department kaihhnawiha Mizoram sawrkar hma lakna hrang hrang leh mamawhte a sawipui.

School Education Minister hian Mizorama PM SHRI school neih belh a ṭul thu a thlen a. PM SHRI hi Pradhan Mantri Schools for Rising India tih niin centrally sponsored scheme a ni a. National Education Policy (NEP) 2020 kalpui hmasa tur school thlan chhuah 14,500 awmin heng school-te hi school dang tana en tawn tura buatsaih an ni a, Mizoram bik atan school thlan chhuah 30 a awm mek a ni.

Higher & Technical Education Minister ni bawk Dr Vanlalthlana chuan Mizoram Engineering College chungchang a thlen bawk a.Prime Minister-in Mizoram Engineering College, Pukpui a hawn aṭanga kum 5 hnuah pawh class la lak ṭan theih a nih loh chhan sawi fiahna leh Mizoram sawrkarin hma a lak dan hrang hrangte Union Education Minister chu a hrilh fiah a ni.

Higher & Technical Education Minister chuan NIT, Lengpui campus-a state sawrkarin harsatna a tawh sut kian mek a nih thu a sawi a. State sawrkarin forest clearance a neih loh avanga penal interest chawi tur cheng vaibelchhe 2 vela an tihhniam thu a hrilh bakah, Ministry of Environment, Forest and Climate Change lama ngaihvenpui turin Union Minister of Education chu a ngen nghal a ni.

Heng bakah hian School Education Minister Dr Vanlalthlana chuan Samagra Shiksha zirtirtu hlawh chungchang a sawipui a, Central aṭanga programme hmang tura tih tam lutuk tih tlem a ṭul thu a thlen bawk.

Mizoram Education Minister leh Union Education Minister inkawmna azarah hian Corporate Social Responsibilty (CSR) kal tlangin Mizoram school ṭhenkhatah Science, Technology, Engineering and Mathematics (STEM) Lab neih a ni dawn a, hei hi academic session thar aṭanga hman ṭan theih tura beisei a ni.

Mizoram Education Minister hi Pu David Lalthantluanga, Special Secretary, School Education Department leh Pu C. Lalthanzira, State Project Director, Samagra Shiksha ten an ṭawiawm a ni.