1092/2022-2023
Aizawl, 29th June, 2022 : Vawiin khan Mizoram State Agriculture Horticulture Forestry & Marketing Cooperative Federation Ltd. (MAHFED) chuan McCabe Hall, Aijal Club-ah General Body Meeting vawi 24-na an nei a. Cooperation Minister Pu C. Lalrinsanga chu Khuallian niin he hun hi a hmanpui a, Tuirial Bialtu MLA Pu K. Laldawngliana bakah Mizoram State Cooperative Union leh Cooperative Society hrang hrang hruaituten an tawiawm a ni.

Chairman Pu Vanlalruata kaihhruai MAHFED General Body Meeting hawnna inkhawmah hian Khuallian Pu C. Lalrinsanga chuan thusawiin Cooperative Movemnet hi a pawimawh hle a, Pathian Thuin mihringte induhsak tawna chengho tura min zirtir dan nen pawh a inmil hle a ni a ti. Cooperative Society hlawhtling tur chuan thawhhona tha a tul hle a, tanrualna tha leh tha lo rah chu hlawhtlinna emaw tlukchhiatna emaw a thlen thei a ni a ti bawk. Thawhhonaah chuan rinawmna a pawimawh ber a, rinawmna tel lo chuan pawlin a tum a hlenchhuak thei ngai lova, hmasawnna leh hlawhtlinna ai chuan nghirnghona leh pawl kehchhiatna a thlen thei hial a ni a ti. Cooperative Movement chu Act & Rules nei thlap a nih angin dan ang zela hnathawh leh hmalak chu duhthusam a ni tiin Pu C. Lalrinsanga chuan Member kalkhawm zawng zawngte pawhin Act & Rules te zirchiang turin a hrilh. Sorkar flagship programme hnuaiah vaimim leh bekang chu kalpui mek a ni a, vaimim 5000MT tharchhuah beisei a nih thu te, OP12 bio-fertiliser siam leh zau zawka hman tum a nih thu te, Tualte, Lunglei leh Mizoram hmun 12 laiah Cold Storage siam tum mek a nih thu te Minister chuan a tarlang a. Thlai chi pawh phai atanga lak luh ngai lovin, Mizoram chhunga mi ngei hman a nih zel theih nan sorkarin theihtawp a chhuak mek tih thu a sawi bawk.

Vawiin General Body Meeting hawnna inkhawmah khan MAHFED Managing Director Pu Ngurthansanga Sailo chuan an hmalakna hrang hrang leh sum dinhmun Report kimchang tak a pe a. MAHFED Ltd ah hian Affliated Member 115 an awm mek a, kum 2021-2022 a sum dinhmun chu Rs.27, 402, 795.83/- a ni.