1091/2022-2023
Champhai, the 29th June, 2022: Food, Civil Supplies & Consumer Affairs (FCS&CA) Department, Local Administration Department (LAD) leh Fisheries Department changtu Minister Pu K. Lalrinliana chuan vawiin chawhnu khan Champhai leh a chhehvela a enkawl department pathum hmunhma thenkhat leh hmalaknate tlawhin a enfiah.

Minister hian New Champhaia Local Administration Department ram leh VC Rest House-te a tlawh a, hmunhma neih dan leh hmalak tul angte a enfiah a. New Champhaia Supply Department Kudam pawh tlawhin buhfai dahkhawlte leh Kudam cheithat ngaite a enfiah bawk. DCSO Champhai tarlan danin tun dinhmunah Champhai District pumah fur ruahtui tlak hun chhunga rin tur thla thum leh a chanve daih buhfai chhekkhawl fel tawh a ni. Hemi hnu hian Fisheries Department hnuaia Pradhan Mantri Matsya Sampada Yojana (PMMSY) kaltlanga Sangha chi tharchhuahna tur 'Construction of Freshwater Finfish Hatchery Unit', Tlangsama siam mek pawh a hmunah kalin a enfiah bawk a, Champhai District tana tangkai tak leh sangha chi intodelhna tura pawimawh tak tur a nih angin theihtawp chhuaha enkawl a tul tih a sawi.

Minister Pu K. Lalrinliana hi Bawrhsap Pu James Lalrinchhana, Department hotute leh khawtlang hruaituten an tawiawm a ni.

Ruahman dan chuan naktuk June ni 30, 2022 Ningani chawhma dar 10:30 hian Kahrawt Hall-ah Remna Ni lawmna neih a ni dawn a. He hun hi Food, Civil Supplies & Consumer Affairs Minister Pu K. Lalrinliana chuan khuallian niin a hmanpui dawn a, Health & Family Welfare Board Vice Chairman Dr. ZR Thiamsanga chu khualzahawm a ni ang.