3342/2024-2025

Dated Aizawl the 03 December 2024: Vawiin chawhnu dar 3:00 khan Cooperation changtu Minister Pu P.C. Vanlalruata chuan National Federation of State Co-operative Banks (NAFSCOB) Diamond Jubilee lawmna New Delhi - Bharat Mandapam, Pragati Maidan neih zawh taka Mizoram Cooperative Apex Bank Ltd.-in 'Annual Performance Award For Best Performing State Cooperative Bank II-Tier Structure 2023-2024' an dawn lawmna, Tourist Lodge, Chaltlanga buatsaih chu Khuallian niin a hmanpui.

He hunah hian Khuallian Cooperation Minister Pu P.C. Vanlalruata chuan APEX Bank-te lawmpuina leh fuihna thute sawiin, APEX Bank-in Cooperative Bank titha chawimawina a dawng thei chu Mizoram State ang pawha inchhuanna tham ni a a hriat thu a sawi a. Board member leh thawktute inpekna chhuanawm a tih thu tarlangin, Cooperative dinhmun chuan Mizoram ei leh bar thlengin a nghawng tih a sawi a. Sawrkar chu bank-te nena tang hovaa mipuite tana thawk tur a nih thu tarlangin, mipuite tana rawngbawlna thinlung pua thawhhopui turin bank-te chu a ngen nghal a. Taima lehzuala mipuite tana thawk tura chahin, Sawrkar policy kallaite pawh ngunthluk lehzuala vilpui turin a sawm nghal bawk a ni.

Vawiina hun hman hi Pu Lalnunsanga, Chairman MCAB Ltd. chuan kaihruaiin, lawmman dawn sawifiahna a nei nghal a. Pu John L.T. Sanga, Registrar of Cooperative Societies pawhin thusawiin, Pu  Rosiamliana Ralte, Director MCAB Ltd. Chuan lawmthu sawiin hun hman hi a khar a ni.

Mizoram Cooperative Apex Bank hi kum 1982 July ni 31 khan Mizoram Sawrkarin a din a. Apex bank hnuaiah hian tun dinhmunah thawktu 300 chuang awmin Branch 30 leh ATM 38 vel an enkawl mek a. India rama 2 Tier State Cooperative Banks zinga tehfung hrang hranga ti tha ber hi a kum zawnin kum 2022-23 leh 2023-24-ahte APEX Bank hian a lo dawng tawh a. He lawmman hi November ni 26, 2024 khan NAFSCOB Golden Jubilee lawmna neihah Union Cooperation Minister Pu Amit Shah chuan a lo hlan tawh a ni.

Tun dinhmunah Apex Bank hian Deposit cheng vaibelchhe 1539.2 a dawn atangin loan cheng vaibelchhe 1206.1 pe chhuakin, deposit an dawn atanga loan an pek chhuah tehfung (CD Ratio) chu 78.8% niin, Mizorama Bank zingah pawisa dawn atanga teha loan pe chhuak tha ber an ni mek a ni.