3641/2024-2025

Dated Hnahthial the 3rd December, 2024: Vawiin khan Hnahthial DC Meeting Hall-ah Bawrhsap, Pi Rita Lalnumawii Pachuau kaihhruaiin Startup India aiawha rawn kalte leh Hnahthial District chhunga Farmer Producer Company (FPC)-te bakah entrepreneur (sumdawnna bul tantu) hrang hrangte nen thutkhawmna neih a ni a. Startup India thiltumte ngaihthlakna neih niin Department for Promotion of Industry and Internal Trade (DPIIT) recognized nih avanga hamthatna hrang hrang awmte chu FPC leh entrepreneur te hnenah inhrilhhriatna neih a ni. 

Statup India Assistant Manager Pu Alanckrit Jain leh Senior Manager Pu Binil Matthew te hnen atangin Startup India thiltum leh an rawn kal chhante ngaihthlak a ni a. Startup India chu January 2016 atanga kalpui tan tawh anih thu sawiin a thil tum ber chu India ramin sumdawnna lama hma a sawn theih nan sumdawnna lama bul tantute a theih dan dana puih anih thu an sawi a. India ram District tina Startup an awm theih nan ‘District Outreach Programme’ kalpui mek anih thu sawiin chumi avanga Hnahthial District-a rawn kal an nih thu an sawi a. DPIIT recognized ni tura mamawhte leh in register dan tur bakah hamthatna awm theite inhrilhhriatna neih niin FPC leh entrepreneur kalkhawmte nen an sumdawnnna atana an mamawh hrang hrangte sawi hona neih a ni.

Startup tih hi sumdawnna tan satliah ni lo, mumal deuhva company anga dinga DPIIT in a recognize ho sawina a ni a. DPIIT recognize ni tur chuan sole proprietorship anga kalpui theih ni lovin private limited company emaw, partnership firm emaw limited liability partnership nih a ngai a. Hei bakah hian business chu kum 10 aia upa lo a nih ngaiin financial year khatah Rs 100 crore aia tam lo a la lut tur a ni a. Hei bakah hian business chuan sum lalut ngawt lovin a kal zel turah pawh thanna tur neiin midang tan hna a siamsak thei tur a ni.

DPIIT recognized nih hian hamthatna hrang hrang neiin Central lam atanga hamthatna rawn kalte an hmu thei dawn a. Hei bakah hian mahni thil siamchhuah hauhna (Intelectual Property Rights) neih kawngah puih an ni dawn bawk. Sumdawnna an kalpuina kawnga chhiah (tax) hrang hrang awmte ah pawh exemption an neih theih dawn bakah an sumdawnna kal zelna atan funding awm dawnin an thil thar chhuah zawrh leh hralh (marketing) kawngah pawh puih an ni dawn a ni.

Thutkhawmnaah hian Pu Samuel Vanremruata, Programme Manager, MSUM; Pu Lalthakima, DHO; Dr. Henry Saplalrinliana, Sr. Scientist & Head, KVK; Pi Linda Lalduhzuali, ADAO leh Pu R. Vanlalruata,SDC te an tel bawk a ni.