Vawiin khan Cooperation Minister Pu C Lalrinsanga'n North East Small Finance Bank, Aizawl Branch chu Tuikhuahtlangah a hawng.

Pu C.Lalrinsanga chuan North East Small Finance Bank, Aizawlah hawn a ni ta chu lawmawm a tih thu sawiin hmar chhak leh Assam-a private bank ding hmasa ber, kum reilote chhunga chak taka hmasawn, hmar chhak state hrang hrang leh West Bengal te thleng tuam chhuak thei khawpa bank thang chak an ni chu Mizoram pawhin a tangkaipui ngei a beisei a. Mizoramah banking sector a thang chak hle a, chutihrualin CD Ratio lamah an sang lo niin a lang tiin Minister chuan hemi kawngah bank ten hma an sawn tul a tih thu a sawi a ni. North East Small Finance Bank chuan khawtlang hmasawna kawngah hna thawkin a bik takin hmeichhe dinhmun chawikan kawngah tan an lak nasatzia a hriatin lawmawm a tih thu Pu C.Lalrinsanga chuan a sawi a. Sawrkarin SEDP hmangin Mizoram khawtlang nun leh sumpai dinhmun hmasawn nan tan lak a tum tih sawiin Co-operative movement lam hawia nasa taka kalpui a nih dawn avangin bank-te mawhphurhna a sang dawn hle a ti a, North East Small Finance Bank-te tawiawmna a ngen nghal bawk a ni.

RGVN (North East) Microfinance Ltd. tia hriat hlawh thin North East Small Finance Bank hian March ni 31, 2017 khan RBI atangin Small Finance Bank din phalna license a hmu a. Public Limited Company angin July 25, 2016 ah register lo ni tawh a ni. He bank hi tlawmngai pawl (NGO) anga ding hmasain RGVN NE Micro Finance Limited tih hming pu in hmarchhak State hrang hrangah kum 30 chhung bu a lo khuar tawh a, branch 163 zet a nei a ni. North East Small Finance Bank hi October 17, 2017 atangin a takin hna a thawk tan a. North East state hrang hrangah bank branch 91 leh asset centre 88 a nei. Hmeichhiate chawikan kawngah hma a la nasa hle a, eizawnna an neiha lei rem an rah theih nan hmeichhia nuai 5 zet hnenah loan a lo puktir tawh a ni. Heng bakah hian khawtlang hmasawnna hna hrang hrang thawkin thingtlang khuaah a thlawnin health camp te a buaitsaih a, financial literacy program tum engemawzat an kalpui bakah a thlawna ran hriselna endik (animal treatment) camp thlengin an buatsaih tawh thin a ni.

Aizawl branch hi a duh apiang tan account hawn theihin a inpeih fel tawh a. Fixed Deposit rate hi 10 percent a ni a, savings account rate hi 7 percent a ni.

Bank hawnna inkhawmah hian Branch Head Pu Robert C Lalremruata'n kalkhawmte lawmna thu a sawi a, Zonal Head Pu Anup Kumar Sinha pawhin thu a sawi a ni.