Vawiin khan Tourist Complex, Beraw, Aizawl ah Mizoram Civil Service Association chuan General Conference vawi 44 na an hmang a, Home minister Pu Lalchamliana chuan khuallian niin a telpui.

Home Minister Pu Lalchamliana chuan,” MCS chu sawrkar tana hna pawimawh tak thawktu in ni a, hna hrang hrang in chelhnaah rinawm tak a hnathawh hi a pawimawh hmasa a ni,” a ti a,” Dik leh rinawm tak a hna thawh hi a kristian a, a mizo bawk a, mahni ah lungawina min pek mai bakah midangte tana chhawrtlak leh tangkai kan nih phah thin bawk a ni,” a ti. Pu Lalchamliana chuan,”Inrelbawlna kalpui dan kawng pawimawh tak pahnih awmin chungte chu Mechanical approach leh Humanistic approach a ni a, mipuite tan a rawngbawlna hlawk zawk kan kalpui theih nan Humanistic approach hi kan hman fo a tha a ni,” a ti a,” Thingtlang lama khawsak harsat zia te hi kan hriatchian a ngai hle a, mi harsa tak tak ten in puihna dila in pisa a anlo dawr hunah che u tanpui theihna a awmlo a nih pawhin tawngkam tha nen inlo dawngsawng thin tur a ni,” a ti bawk. Home Minister chuan, Mi harsa leh rethei zawk te dawm kan an nih theih nan Sawrkar in ngaihtuahna a sen nasat thu sawiin Health Care scheme te duangin changtlung taka kalpui tum a nih thu a tar langa,” MLA zawng zawng ten kan thla hlawh atanga zaa pakhat hi Health care scheme atana thawh turin kan rel a, kan sawrkar hnathawk dangte pawh hian hetiang ang ngaihtuahna pu ve tur hian ka chah duh a ni,” a ti a, Sawrkar inrelbawlna hrang hrangah ngaihtuahna seng peih leh tangkai nih tum tlat turin a chah bawk.

Pu Vanlalmawia, Director, SIRD & PR chuan MCS Officer tharte fuihna thuchah  sawiin,” In en let peih mi nih a pawimawh hle a, midang hian eng angin nge min hmuh tih hi kan inchhut nawn fo a pawimawh a ni,” a ti a, rinawm kawngahte, taimak kawngahte, hna thiam kawngahte leh inzir kawngahte hma sawn tuma in enlet peih mi nih tum turin a chah. Pu Vanlalmawia chuan Sawrkar hnathawktute chu Sawrkar neitute kan ni a, Sawrkar hna chu neitu nihna thinglung pu chunga thawk theuh turin MCS Officer zawm tharte chu a fuih bawk.

General Conference chawhma hun hi Pu K Laldingliana, Vice President MCSA in a kaihruaia MCSA member boralte vuina hun hman niin MCS zawm thar mi Sawm panga lawm luhna hun hman a ni. Khuallian in MCSA Magazine RAHBI a tlangzarh a, Pu Lalzirmawia Chhangte, President MCSA in thusawina hun neiin Pi Florence Zotluangpuii, Director, RD in lawmthu sawina hun a hmang bawk. Mizoram Civil Service Officer Profile 9th edition a alan dan chuan MCS Officer 213 awm mekin chung zingah chuan Supertime Grade A panga (5), Supertime Grade B pasarih (7), Selection Grade 24, Junior Administrative Grade 44, Senior Grade 80 leh Junior Grade 53 te an ni.