Vawiin chawhma khan Archives Hall, Babutlangah Mizoram Apex Handloom & Handicraft Cooperative Society Ltd(MAHCO) chuan an pawl khawmpui lian vawi 42-na an hmang a. He hun hi Cooperation Minister Pu C.Lalrinsanga chuan khuallian niin a hmanpui a ni.
MAHCO palaite leh Cooperative Apex Societies hrang hrang hruaitute fuihna thu sawiin Cooperation Minister Pu C. Lalrinsanga chuan cooperator te chu society anga an intel chhan leh an thil tum te bihchiang nawn turin a chah a. Mizoram Cooperative Society hrang hrangte chuan anmahni puala hamthatna leh intodelhna an ngaihtuah rualin Mizo mipui mamawh tam zawkte dehchhuah tum turin a fuih a. " Zing kar atanga tlai inkarah hian kan thil hmanral te hi mitin te hian han enlet ta ila; tualchhunga kan siam thiam leh kan siam theih, siam kan tum lem loh avang leh a nachang kan hriatloh avanga state pawn lam thilsiam kan hman tam tak a awm a. Heng pawnlam bungrua kan leina atana kan sum senso zawng zawng te hi kan cooperator te hian sum siam nan kan hmang thei a ni tih kan chian thar leh a ngai a ni", a ti.
Dawra hmawmsawm, chawhmeh packed, Inbualna Sahbawn leh Thawmhnaw sukna, Vun hnawih leh hmai cheina chi hrang hrang, pawn than, thawmhnaw tam zawk te leh nitina kan ban lawr thil thenkhatte chu Cooperative hnuaia society intelkhawm ten an siam theih vek a ni tih a sawi a. Hlawk leh zual turin Cooperator te chuan an dehchhuah thil zinga chuang bang deuh te ti riral mai lova thildang siamnan hman tangkai an chin thar a ngai tih a sawi a. An thil deh chhuah te chu hralh theih loh a nih nachhan te enliam mai lova an zirchian zel a pawimawh a ni a ti.
MAHCO palaite chu an sumdawnna huang zauh turin an thil dehchhuah hralh kawngah nasa zawka tanlak leh inzarpharh an mamawh tih a sawi a. Chutih rualin Mizo dehchhuah thuamhnaw te mi tamzawkin an banphak nan a man thuhlah pawh a awm tawk neih a that thu a sawi a. A bikin Handloom huanga society te hmalakna phei chuan puan leh thawmhnaw ringawt a huam lova khualzinmite hipna lam(Tourism) bakah hnam thil (Culture) te pawh a kaihhnawih tel a. Eizawnna a ni ngawt lova mawhphurhna pawimawh tak a ni tel a ni a ti. Cooperation Minister chuan Handicraft chungchangah Mizote ang tluka kut themthiam an tam loh thu sawiin hma kan sawn tawk lohna chhan chu thil kan chik loh avang pakhat a ni a. "Kan anpui khawchhak lam mite atangin Thing kermawi leh themhnang hmanga tahmawi thil atang te hian sum tam tak kan lalut thei tih pawh hi kan hriatthar leh a ngai a ni", a ti.
Cooperation huanga hmalakna hi intodelhna kawnga ke penna pawimawh ber zinga mi a nih avangin Sawrkar pawhin Society te mamawh phuhrukna tura tanpuina awm ang ang te chu theih tawpa haihchhuah pawh a tum a ni a ti a. Hetih rualin Cooperative Society chu thawhhona tha, induhsak tawnna leh inrin tawnna nen lo chuan a hlawhchham fo tawh thin a ni a ti.
MAHCO khawmpuiah hian khualzahawm Pu JP Agarwal, Secretary, Cooperation pawhin fuihna thu a sawi a. MAHCO in kum 41 chhunga hmalakna a neih te a lo zirchian hnuah hmasawnna tur tam tak a awm tih a tarlang a. A hmasa berin customer lei tura thil chhawpchhuah te chuan Customer duhdan leh mamawh dan anga siam thiam a pawimawh a. Thawmhnaw man to tak hralh theih si loh siam ai chuan mipui nawlpuiin an ban phak tura man man zawka thilsiam a pawimawh a ni. Hlawk turin thil tam tham hralh angai tih kan hriat chian a pawimawh a. Chuvangin puantahtute tan pawha dehchhuah zung zung theih tur design siam nachang hriat te, hralchhuahna hmun tam zawk siam te bakah hralhchhuahna lai tur dawr leh hmunhma thlan thiam thlengin awmzia a nei thin a ni a ti.
MAHCO Annual General Assembly 2019 hawnna inkhawm hi Dr. Zohmangaiha, Chairman, MAHCO chuan a kaihruai a. Annual Report of MAHCO 2018-19 chu Pu Lalrinawma Pachuau, Managing Director, MAHCO hnen atangin ngaihthlak a ni. Report a tarlan dan chuan MAHCO hian anmahni puala building atan kum 2014-15 chhung khan MC Apex Bank hnen atangin Rs 180 Lakh man ,Hotel Raj Building chu a bain an lei a. Tunah hian National Handloom Development Programme(NHDP) hnuaiah Rs 180 Lakh a din tur, Aibawk Block Level Handloom Cluster chu thawh mek a ni. Kum 5 chhunga Rs 846 Lakh senga peihfel hman tur, Handicraft Project pawh Aibawk Block chhungah tho hian thawh tan mek a ni tawh bawk a ni. Kum 2018-19 chhung khan Mizoram hmun hrang hrangah Handloom Fair buatsaih thin a ni a. Special Handloom Expo(SHE) chu Lunglei, Champhai leh Kolasibah neih a ni a. District Level Event(DLE) pawh Mamit-ah neih a ni. MAHCO chuan kum 2019-20 chhung hian hmanral tur budget Rs203,14,500/- beiseiin Rs 304,40,000/- thawh chhuah a, hlep Rs 101,25,500/- neih an inring a ni.
