Vawiin chawhnu khan Cooperation Minister Pu Lalrinmawia Ralte chuan Aizawl Community Centre, Assembly Annexe Building hnuai ah ni 5 awh tur AIZAWL DISTRICT HANDLOOM FAIR a hawng. Veng hrang hrang atanga Cooperative society te chuan July 5 thleng Aizawl Community Centre ah hian dawr 30 hawng in Mizo puantah, thawmhnaw leh thildang te dawr pangngai aia tlawm in an zuar dawn a ni.

Handloom Fair hawngtu Cooperation Minister Pu Lalrinmawia Ralte chuan Mizo puan leh thawmhnaw tah leh zuartute chu an kutchhuak hrang ah te quality ngaipawimawh ber turin a chah a. A leitu te mit tlung leh lungawi zan theihna tur zawrh chu hlawkna thlentu leh advertisement tha ber a ni a tiin khawvel ram changkang zawk ami te pawhin an thil lei a an en ber leh ngaih pawimawh ber lai chu a man nena inmil quality tha ber a nih thu a sawi. Mizoram pawn hmunpui zawk ah te whole sale a Mizo kutkhuak te kan la zuar thei te a nih phei chuan tun ai hian hmasawnna leh hlawkna lian tham zawk kan hmu dawn a ni a ti. Mizo puan leh kutchhuak te hlutna chang kan hre chho zel a, hnamdang te pawn min hlutsak zia kan hmuh mek zel lai hian a hlawm a hralhna man bituk te leh a mala zawrh chhawnna man bithliah kan neih a tul tawh a ni a ti a. State pawn, zinvahna hmun hrang hrang leh ram pawna hnamdang te zingah Mizo mipa ten Mizo kutchhuak ipte chei, kawr leh khumbeu te kan uar tan a, hei hi thil lawmawm tak a nih laiin a siam chhuaktu ber kan Mizo hmeichhiate chu Mizo incheina an in bel tam tawk lo deuhvin a lang a. Kan hmeichhia te pawh hemi kawnga tan an lak deuh chuan a lawmawm hle ang a ti.

Vawiin a tan tak, Aizawl District Handloom Fair hi Ministry of Textile, Government of India tanpuina sum hmanga MAHCO in a huaihawt a ni. Registrar of Co-operation Pu Jack L. Darkim leh Mizoram Co-operation hnuaia Society hrang hranga hotute he hun ah hian an tel a ni.