India rama Physics leh Economic Planning thiam Prof Prasanta Chandra Mahalanobis piancham ni 29 June-a kum tina hman thin Statistics Day vawi 8-na chu vawiin khan Mizoram Legislative Assembly Speaker Pu Hiphei hovin Synod Conference Centre, Aizawl ah hman a ni. Statistics Day hi kumin hian Pathianni a nih avangin Mizoram ah chuan vawiin khan hman a ni ta a ni.

Khuallian Pu Hiphei chuan Prof. P.C.Mahalanobis chanchin tlangpui te sawiin India ram hmasawnna tura a thawhhlawk dan te a tarlang a, ram mipui hnenah hmasawnna rualkhai taka a thlen theih nan data leh statistics rintlak nena ruahmanna fel tak duan thiam a pawimawhna te a sawifiah bawk. Economics & Statistics Department chuan Mizoram mipui dinhmun an hriatchian a pawimawh thu sawiin kawng hrang hrang leh tehna hrang hrang hmanga statistics leh data an lakkhawm te chu ram hmasawnna atana hmalakna ah a tangkai dan te a tarlang bawk. Department hmalakna hrang hrangah mipui lam pawhin tha taka lo tawiawm zel turin Pu Hiphei chuan kalkhawmte chu a chah bawk.

Speaker hian Statistical Abstract of Mizoram 2013 leh Mizoram Economic Journal chhuah hmasak ber te chu a tlangzarh nghal a, ‘Mizoram economy than nan Service Sector aiin loneitute leh kuthnathawktute an pawimawh zawk’ tih thupui hmanga Statistics Day puala Essay inziahsiaknaa titha heng mi te hnenah hian lawmman a sem nghal bawk :-

Pakhatna : C.Lalnunmawia, MZU Rs 20,000 /-

Pahnihna : C.Zosangliana, Mission Vengthlang Rs 15,000 /-

Pathumna : Lungduhsanga, Bazar Veng, Lunglei Rs 10,000 /-

Heng bakah hian mi 5 hnenah Consolation Prize Rs 5,000 /- theuh hlan an ni bawk.

Kumin Statistics Day atan hian thupui Service Sector Statistics hman a ni a, chawhnu lamah Govt. T.Romana College leh Govt. J.Thankima College zirlai ten ‘Mizoram Economy than nan Loneitute leh kuthnathawktute aiin Sorkar hnathawkte an pawimawh zawk’ tih thupui hmangin inhnialfiamna (Debate) an hmang bawk.

Vawiina Statsitics Day lawmna hi Economics & Statistics Department Director Pu Saihlira’n a kaihruai a, Pu Ngunlala Chinzah, Principal Adviser cum Additional Secretary, Planning & Programme Implementation Department leh officials dang ten an hmanpui bawk a ni.