Departmental exam leh seniority promotion hmanga Mizoram Finance and Accounts Service (MFAS) officer lak tharte tana training buatsaih chu Parliamentary Secretary Pu K.S. Thanga, Finance Department changtu chuan a hawng. Training hi thla khat leh a chanve chhung awh tura ruahman niin Administrative Training Institute, Aizawlah a neih a ni.

Pu K.S. Thanga chuan Finance officer-te chu sorkar sum bawm khawihtu, ziah fel, pekchhuah leh dawnsawn hna thawktu an nih avangin an pawimawh hle a ni, a ti. MFAS officer-te chu hun engemawchen hna an lo thawh tawh atanga tawn hriat an neih leh training an neih chhung zawnga thil pawimawh an zir tur te chhawr tangkaia, sorkar leh mipuite tana chhenfakawm an nih ngei a beisei thu a sawi a. Hleih neih leh awn lam nei lova, dik tak leh rinawm taka an hna te thawk turin a chah a ni.

MFAS foundation course training hawnna inkhawm kaihruaitu ATI Director Dr.Lalrozama, IAS pawhin Mizoram-in premier institute a neih ATI hi a hlutzia hria a, hei aia changtlung zawka thuam that a tul thu leh state pawn lam mite mithmuha pholan tlak leh chhuanawma siam tul a tih thu a sawi a ni.