Tukin zing kar khan Ministry Of Tribal Affairs sum Rs. 364 lakh hmanga sak, zirlai 100 awm theihna tura ruahman Senhri ST Girls Hostel Pachhunga University College(PUC) ami chu Lok Sabha Member of Parliament Pu C.L. Ruala'n a hawng. Bialtu MLA Pu R.Vanlalvena, Mizoram University(MZU) Vice Chancellor Prof.R.Lalthantluanga, MZU Registrar Pu Zothankhuma, MZU Controller of Examination Prof. R.L. Thanmawia leh mi pawimawh sawm bik te he hun ah hian an tel a ni.

Member of Parliament Pu C.L.Ruala chuan vawiin chu Remna Ni a nih thu leh Mizote tana ni pawimawh hriatreng tur a nih thu leh inremna hlutzia a sawi hmasa a. MZU, Social Welfare leh building sak hna thawktute inpekna zara hmeichhe zirlai awmna tur tribal hostel tha tak mai khawr pum anih chu lawmawm a ti a. Central ah Mizoram aiawh in a awm thu leh state sawrkar hmalakna te pawh sum haichhuah kawngah leh thil dang ah te pawh tha taka thlawp zel a tum thu a sawi a ni.Pu C.L. Ruala chuan central sawrkar a sum leh tanpuina te haichhuak tur hian kan mi thiam leh mawhphurhna chelhtute kut te chu tun aiin hlei deuh se a tih thu sawiin a theihna zawn ah lo sawipui thin tur leh hma lo lak pui turin a inhuam reng thu a sawi a ni. Amaherawh chu kan project siam reng reng hi State a Nodal department te kaltlang lovin bawhzui a thiang lo a ni a ti. India sawrkarin hmeichhiate chawikan leh an hamthatna kawng zau zawk siam sak a tum mek laia hmeichhe awmna tur hostel tha tak mai sak a lo ni hi thil lawmawm tak leh India sawrkar hmalakna nen a thil inmil tak a ni a ti a. Senhri ST Girls Hostel awm tur te chu hmeichhe puitling, khawtlang leh ram tana mi tangkai tak tak te lo ni chho turin duhsakna a hlan a ni.

Thusawitu dang Prof.R.Lalthantluanga pawhin hostel awm thatna sawiin zirna ah inchawhphur tawnna a nih piah lamah thian tha ber ber te chharna hmunte leh puitlinna zirchhuahna hmun te a ni tel a ni a ti.

Building hawn programme hi Dr. Tawnenga, Principal, PUC leh Vice Principal Prof. J.V. Hluna ten kaihruaiin he Building sak hna thawktu company NECS aiawhin Pu Robert Romawia Royte,Chief Managing Director, NECS in technical report a pe. Technical report a tarlan dan chuan Senhri ST Girls Hostel hi kum 2012 a MZU, Social Welfare Department, Mizoram leh NECS ten thawhhona thuthlung an ziah hnu a Ministry of Tribal Affairs a thlen leh a sakna tur pawh Central Sawrkarin 100% a tum a ni.He building earthquake Resistant structure hmanga design, sak hna hi ni 20.6.2012 khan tan a ni a, ni 19.06.2014 ah revised estimate tel miah lova sak zawh a ni. Building thuthmun zau zawng hi 1688.70Sqm a ni a. Basement, ground floor, first floor leh second floor ah te then a ni a. Room 51, toilet block 5, chowkidar quarter, choka, dining hall, Water tank 2 tui Litre 83700 ve ve dawng thei, overhead water tank 3 tui Litre 9000 theuh dawngthei, Multipurpose Hall mi 100 thut theihna tur te leh store room te Senhri ST Girls hostel ah hian a awm a ni.

PUC Principal Dr. Tawnenga chuan PUC a Mipa leh hmeichhe hostel ah te hian seat tlem a zawng a la ruah thu sawiin admission pawh la hawn leh a ni dawn a ni a ti.