Nimin khan Chief Minister Pu Lal Thanhawla chuan Union Home Minister Pu Rajnath Singh hmuin, Mizoram dinhmun te a sawipui a, mamawh hrang hrangte a thlen bakah ramri chungchang a sawipui bawk.

Chief Minister chuan ram leh mipui venhimna kaihhnawih lama sum hman theihna, Security Related Expenditure (SRE) chungchang Union Home Minister hi sawipuiin, Mizoram awmna pawimawh avang leh a Police ten thenawm state atang leh Bangladesh leh Myanmar atangte a hel a beihletna ah sum tam tak hman thin anih avang leh police thuam thatna atan SRE hnuaia sum hmang thei tura remchanna siam sak turin a ngen a. Tripura transit camp a Tuikuk awmte Mizoram mi dik tak laklet leh chungchang pawh sawipuiin, Mizoram Bru Displaced People Forum (MBDPF) ten laklet leh dodalna an neih thin avanga harsatna a awm thin thu thlen bawkin, hetiang dinhmun karah Mizoram sorkar chuan a laklet hna Road Map I & II siamin, ni 23.6.2014 thleng chhungkaw 1237, puitling 4665 leh naupang 1846 hruaikir an nih tawh thu Chief Minister hian a thlen bawk a ni.

Mizoram leh Assam ramri chungchang Chief Minister Pu Lal Thanhawla hian Union Home Minister Pu Rajnath Singh chu sawipui bawkin, Mizoram sorkar leh a mipuiin Assam nena ramri a pawm chu Bengal Eastern Frontier Regulations, section 2 of 1873 anga Inner Line Notification No. 2299p of 20.8.1875 tihchhuah hi ani tiin, Buhchangphai bula Ramthar zau pawh hi Mizoram chhung ngei a mi anih thu a sawilang a ni. Chief Minister chuan Inner Line Regulatory system hian hnam lian leh tam zawk tena Mizo tribal te an chimral theihna laka a humhalh dan te sawipui bawkin, ramin khualzin tam zawk a hip theihna tura Ministry of Tourism in ILP thlahdul tura rawtna a siam chu Mizo tribal te lakah nghawng thalo tak a neih theih thu a sawipui bawk a ni.

Chief Minister Pu Lal Thanhawla chuan Kuki Nationalist Organisation (KNO) chungchang pawh sawiin, KNO hi independent sual nilo, mahni hnam chanvo nei thei tura rammu an nih thu a sawi a, Manipur sorkar leh Union Home Ministry nena inkahhai an neih mek chu, inbiakna neih chhunzawm leh turin Union Home Minister hnenah hian rawtna a thlen bawk a ni.

Home Minister Pu Rajnath Singh chuan Chief Minister thu thlente chu tha taka ngaithlain, amah tawiawmtu officer te hnenah tih theih apiang chu tihsak nghal turin a hrilh a ni.

Union Home Minister a hmuhna ah hian Chief Minister Pu Lal Thanhawla hi Minister of State for Environment & Forest etc. Pu Lalrinmawia Ralte in a tawiawm a ni.