Vawiin chawhma khan Luangmual venga Youth Hostel hmun ah Nehru Yuva Kendra(NYK) te buatsaih 14 days Training on 'Prospects of important Horticultural crops in the context of Mizoram' kharna hun buatsaih chu Pu T.Sangkunga, Chairman, Mizoram Youth Commission in a hmanpui. Mizoram chhunga District 8 atangin NYK member 58 ten he hun hi an chhim a. Training huaihawt saktu Krishi Vigyan Kendra(KVK) leh Ministry of Youth Affairs & Sports te chuan mithiam te chhawr in NYK member te hi Horticultural kaihhnawih leh eisiam chungchang ah te zirtirna an pe a ni.

MYC Chairman Pu. T. Sangkunga chuan India ram mipui zinga hnathawk thei leh chhawr tlak zinga 10% chiah skill worker tia chhal ngam an nih thu sawiin in khawvel ram changkang zawka hnathawktu 60-96% lai te chu thiambik leh thiam thilnei chhawrtlak hnathawktu an ni thung a ni a ti a. India in skill Labour a tlakchham dan ti ziaawm tur hian Ministry hmasa in Skill Development Initiatives chu kum 2008 khan a lo kalpui tan tawh a. He sawrkar hmalakna tha tak hi Mizo thalai hna hmulo leh zawng mek ten kan belhchian a kan hman tangkai a ngai a ni a ti.MYC hmalakna hlawhtlin puitu tam tak an awm mek zela. Hetih lai hian MYC kaltlanga phai leh hmun danga training mek ti tha peihlo te an awm hi a pawi a, midang te rilru tihnualtu an nih a hlauhawm hle a ni a ti.

Tihtakzet a beih chuan hlawhtlinna hi khawihmun ah pawh hmuh theih in a awm a ni tih hre turin NYK member training na a tel te chu a chah bawk. MYC nena inthlunzawm Skill trainer te chu rintlak an nih thu a sawi a. Heng company te hian an hnuaia zirlai 70% tal hna an hmuh sak loh chuan Central sawrkar in an senso te a rulh sak dawn loh avangin MYC nen a thawkho Skill Trainer te hnena training chu hlawhtlin ngei ngeina tur kawng a ni in alang a ti. State pawn lam atanga hnathawktute rawn lut vak thin pawh hi kan mamawhna avang a ni a, Mizo thalaiten an thiam ang zawng zawng hi thiam vek ila hnathawh tur an nei lo anga an rawn lut lo mai dawn a ni a ti.Tum sang tak nei, state pawn a chhuak a harsatna paltlang ngam, kan thalaite an pung zela. Hei hi thil intihhmuh chi leh kan hmasawnna tur a ni a ti a. Inchhung lum, Aizawl leh Mizoram thlakhlelh em em ringawt hi hmasawnna kawng a ni lo a ti a ni. Thalaite chuan eizawnna kawng an dap laiin khawtlang leh thildanga inhman dan tawk an thiam a ngai a ni a ti.

Vawiin NYK programme hi Pu Raj Kumar Joshi, DYC, NYK, Aizawl in a kaihruai a.He hun lo chhim tu Dr.D.Karthiresan, Dean, College of Veterinary Science & Animal Husbandry, selesih, Pu S.R. Bishnoi, Zonal Director, NYKS leh Dr. Prasad, Programme Coordinator, KVK te pawn thusawina hun an hmang a ni. Dr.Karthiresan chuan Horticulture leh Animal & Husbandry pawimawhna sawiin Agriculture hnuk khalhtu a ni a, hemi kawnga thiamna hi kan thalai tam zawk ten an neih a ngai a ni a ti a. Phurna leh zir chakna a awmna hmun apiang a kal tur leh zirtirna pe turin College of Veterinary Science & Animal Husbandry chu a in huam reng a ni a ti.