Geological Survey of India hnuaia India hmarchhaka Field Training Centre hmasa ber sakna tur lungphum phumna hun chu vawiin khan Khuallian Industries Minister Pu. H. Rohluna' n Durtlang-ah a hmanpui. He hunah hian Higher & Technical Education Minister leh bialtu MLA ni bawk Pu R. Romawia leh Parliamentary Secretary Pu Joseph Lalhimpuia te an tel bawk.

Industries Minister Pu. H. Rohluna chuan India ram chhunga Field Training Centre 12 zinga pakhat atan Sorkar laipuiin Mizoram a thlang chu thil lawmawm a nih thu sawiin, he training centre hi hman theiha sak zawh a nih hunah chuan India hmarchhak leh a bik takin Mizoram tan tangkaina tam tak a thlen ngei a beisei thu a sawi a. Field Training Centre zarah Mizoram leilung zirchianna kawngah leh, chhiatrupna thleng thei laka inven dan kawngahte hmasawnna tha tak a awm a beisei thu a sawi bawk.

Higher & Technical Education Minister Pu R. Romawia chuan Field Training Centre chuan thiamna kawngah Mizoram a ti hmasawn tur chu lawmawm a tih thu a sawi a. India Hmarchhak state zawng zawngin he Centre hi an inhmantawm tur a nih angin, Mizoram leilung chungchang zir mai bakah hnam ziarang hrang hrangte inzirtawn sakna hmun a lo nih tel a, inpumkhatna a thlen theih a beisei thu a sawi a ni.

Parliamentary Secretary Pu Joseph Lalhimpuia pawhin Field Training Centre chu tangkai taka hman hun a nghahhlehawm thu sawiin, zirlai pangngai, he hmuna training nei tur te bakah Sorkar mi leh sa te tan pawh he hmun leh an khawl neihte hman tangkai a la nih theih a, Mizoram Sorkar nen thawhhona tha tak a awm zel a beisei thu a sawi a ni.

Dr. S. K. Wadhawan, Geological Survey of India Director General chuan Durtlanga Field Training Centre tur chu GSI-in 'world-class training centre'-a siam a tum thu a sawiin, an hmalam hunah pawh Durtlang khawtlang hruaitute nen pawh lungrual taka an thawhho zel a beisei thu a sawi a ni.

Field Training Centre hi Sorkar laipuia Ministry Of Mines hnuaia Geological Survey of India-in India chhung hmun hrang hranga leilung chi hrang hrang zirchianna atan centre a siam 12 zing ami tur a ni a. Mizoram leilung awmdan te, leimin, lirnghing leh leilung hausakna leh thil pawimawh dangte zirna hmun tur a ni. Kum 2010 atang khan Mizoramah UPSC paltlanga GSI hnuaia officer te tan training hi kalpui tan tawh a ni a, Field Training Centre hi sak zawh a nih hunah phei chuan chipchiar zawka zirna pawh kalpui a nih ngei beisei a ni.

Vawiin FTC sakna tur hawnna inkhawmah hian GSI hnuaia Deputy Director General pathum -Dr. P.B. Sarolkar, Dy. Director General, GSI, Kolkata, Raghubir Singh, Dy. Director General, GSI, Shillong leh L. Harendranath, Dy. Director General, GSI Training Institute, Hyderabad-te, Geology & Mineral Resources Director Dr. H. Lallenmawia leh officer dangte, Durtlang Local Council hruaitute leh GSI hnuaia Trainees-te an tel a ni.