New Delhi-a cham mek Chief Minister Pu Lal Thanhawla chuan vawiin khan Union Finance Minister Pu Arun Jaitley chu hmuin, minute 20 vel chhung an inkawm.

Chief Minister hian Mizoram sorkarin sum lama harsatna a neihte sutkian sak dan tur ruahmanna siam turin Finance Minister hi a ngen ber a. Mizoram chu kum 20 chhung rambuaia a awm avanga state dangte aia kum 30 vela economics hmasawnna a hnufual bik anih thu Pu Jaitley hi a hrilh a. Hei vang hian sum dehchhuahna lamah Mizoram sorkar chu pa chhe tak a ni tiin, tunah hian leiba Rs. vaibelchhe sangnga chuang kan neih thu a sawi a. Sum lama kan pachhiatna chhan tam tak bakah Finance Commission din thar apiangin kan phu ang mamawh min pek ngai loh avanga heiang dinhmuna awm ta kan nih thu Chief Minister hian a sawi bawk a. Ni 31.3.2013 thlenga Mizoram sorkar leiba tling khawm chu Rs.5114.20 Crore anih thu Union Finance Minister hi hrilhin, he harsatna sukiang tur hian Special Non-Plan Grant phalsak turin Pu Lal Thanhawla hian a ngen a ni.

Pu Arun Jaitley chuan Chief Minister Pu Lal Thanhawla thu thlente chu ngun taka ngaihthlak sakin, Mizoram sorkar sum dinhmun siam tha tur leh chhanchhuak turin kawng awm thei ang zawng zawng dapchhuahpui alo tiam a ni. Chief Minister hian Pu Arun Jaitley chu Mizorama lo zin ngei tura sawmin, a ni pawhin hun remchang hmasa berah lo zin a tum tur thu a hrilh bawk a ni.

Chief Minister hian New Delhi a cham chhunga tih tur pawimawhte a tih zawh hnuah kar leh nilaini, July ni 2, 2014 khian Aizawl lo thleng leh tura beisei a ni.