Vawiin chawhma khan Cooperation Minister Pi Vanlalawmpuii Chawngthu chuan Samlukhai Community Hall-ah sawrkar laipui Ministry of Textiles leh Mizoram Apex Handloom & Handicraft Cooperative Society (MAHCO) in an buatsaih Hastkala Sahyog Shivir (Handloom and Handicraft camp) a hawng.
Cooperation Minister Pi Vanlalawmpuii Chawngthu chuan thu sawiin handloom leh handicraft hmasawnna tura hmalakna Hastkala Sahyog Shivir camp Samlukhai khuaa hman ani thei chu lawmawm a tih thu a sawi a. Handloom leh handicraft chu eizawnna a tling tiin hmeichhia pawhin chhungkaw enkawl chungin kan ti thei a ni, a ti a. Minister chuan Mizo thuam leh Mizo kutkawih ngaihhlut nachang kan hriat a pawimawh thu sawiin hnam ang pawha zahawmna a ni, a ti bawk. Khawvel changkang zelah handicrafts leh handloom te miin an hluta a man pawh a to chhoh zel avangin Mizorama mau tam tak awmte chu themthiam tan chuan eizawnna tha tak a ni thei, a ti a. Pi Vanlalawmpuii Chawngthu chuan sawrkar hmalakna hlawhtling thei tur chuan mipuite an pawimawh thu sawiin hlawhtling turin tih tak takna leh taimakna nen mahni kawnga ke pen theuh turin kalkhawmte chu a fuih a ni.
Hastkala Sahyog Shivir hawnna inkhawm hi MAHCO Chairman Dr. Zohmangaiha IRS(rtd) chuan a kaihruai a. Chawhnu lamah technical session leh business session neih a ni a, technical session-ah hian Geographical Indication (GI), MUDRA loan leh Goods and Services Tax (GST) chungchang te ngaihthlak niin Indira Gandhi National Open University (IGNOU) leh National Institute of Open Schooling (NIOS) a puantahtute (weavers) leh handicraft lama eizawngte tana course awm chungchang ngaihthlak ho a ni bawk. Hemi bakah hian puantahtu te leh handicrafts lama eizawngte tana tanpuina scheme awmte zirho a ni bawk a ni. Business session-ah hian buyer seller meet neih niin ID card siam leh IGNOU leh NIOS a zir duhte tan registration tihna hun hawn nghal a ni.
Hastkala Sahyog Shivir (Handloom and Handicraft camp) hi sawrkar laipui Ministry of Textiles hmalakna in India ram pumah October ni 7, 2017 atanga October ni 17, 2017 chhungin khaw 200 chuangah neih a ni. Mizoramah chuan Samlukhai bakah Aibawk leh Hualngohmunah neih a ni.
