Pu FC Malsawmtluanga, Manager Mizofed LPG Serchhip chuan tunlaia Serchhipa eirawngbawlna Gas harsat chhan leh Gas hnianghnar tura theihtawpa hma an lak mekna te vawiin hian thuchhuah siamin a sawifiah a. Thuchuah tlangpui chu a hnuai a mi ang hi a ni. 

MIZOFED Serchhip hian tun dinhmunah hian consumer 11016 an nei a, heng zinga 7807 te hi active customer an ni a. Kumin chhung hian mamawh ang zat supply an dawng lo thin chu an buai nachhan ber a nih thu sawiin, an sem dan phungah Trip 13 an dawn tlin loh chuan harsatna an tawh thin thu a sawi a.  Kumin January atanga September thla chhunga Gas an dawn dan kimchang (domestic+commercial cylinder) chu a hnuaia tarlang ang hi a ni - 

1.         January            –          bur 3720+168 (commercial) (Trip 13)                

2.         February          –          bur 2916+96(commercial)  (Trip 10)

3.         March              –          bur 4446+96(commercial)  (Trip 15)                  

4.         April               –          bur 4122+108(commercial)  (Trip 14)

5.         May                –          bur 3798+120(commercial)  (Trip 13)                

6.         June                –          bur 1992 + 96(commercial)  (Trip 7)

7.         July                 –          Bur 1668 + 108(commercial)  (Trip 6)                            

8.         August             –          Bur 1969 + 96(commercial)  (Trip 7)

9.         September        –          Bur 1980 + 108(commercial)(Trip 7) 

LPG hi MIZOFED Serchhip chuan Mualkhang atangin an la a, nikum lam atang tawhinTransporter tlan tha duh lote avangin harsatna tawh tan a ni a; sawrkar pawhin IOC nen inremna te siamin Supply Department hnuaiah truck 14 vel inziak lutin harsatna zualpui chu sutkian a ni a. Nimahsela chung truck te chu December a thlen meuh chuan an bang zo leh deuh vek tawh a ni. Mualkhang atang hian Mizoram chawm tur hian nitin truck 21 vel a ngaih laiin tun dinhmunah truck in report  thei hi 5-8 vel chauh te a ni thin a, heng truck in report atang hian Serchhip ta tur chauh phurh reng theih a nih bik loh avangin hetiang hian harsatna kan tawk chho ta a ni. 

Harsatna kan tawh mekah hian IOC pawh in theihtawpin hma a la reng a, Borkhola Bottling Plant (Silchar) hnuaia truck tlan thenkhat pawh an pawt peng ve bawk a ni. Mahse chuti chung chuan indaih tawk a la awm thei lova; thla hnih thla thum chhung vel dawn that loh chuan chu chuan hun rei tak min nghawng pha thin a, thla khat dawn that emaw ringawt khan a hliahkhuh zawh leh loh thin avangin harsatna kan tawk leh thin a ni a, ti. 

Gas supply chungchanga harsatna chhante hriatthiampuia, Gas hnianghnar tura theihtawpa hma an lak mekna te hriatsak turin Serchhip mipuite a ngen a ni.