NEDP hnuaia Entrepreneurship Development Scheme in a buatsaih “Exposure Trip to West Bengal Industrial Centre” a Entreprenuer 18 zin tur te leh IIM Calcutta Innovation Park-a “Training of Trainers” chhim tura kal Master Trainer 10 te chu tukin zing khan Minister of State for Cooperation, Fisheries, etc. Pi Vanlalawmpuii Chawngthu chuan Planning & Programme Implementation Department office kawtah a vailiam. Entrepreneurship Development Scheme hi New Economic Development Policy hnuaia Mizoram State Entrepreneurship Development Monitoring Committee (MEDMOC) kaihhruai, Planning & Programme Implementation Department-in a enkawl a ni.

Minister Pi Vanlalawmpuii Chawngthu chuan exposure trip leh training a kal turte chu sorkar hmalakna hnuaia anmahni mimal bakah ramin hma a sawn theihna tura sorkar ruahmanna kaltlanga kal tur annih hre reng chunga an cham chhunga hun hlawkthlak tan an hman a beisei thu a sawi a. Midangin a nachang an hriatloh eizawnna chhenfakawm tak tak kalpui dan tha zawk te zirchhuak a, thangtharte tiphurtu an nih a beisei thu te a sawi. Pi Vanlalawmpuii chuan NEDP hlawhtlinna lo lanchhuahna tur chu tuna zin turte ah hian thui tak a innghah thu sawiin, training leh exposure tour a kal turte chuan hun tha an neih chu bawhpelh lova, hmasawnna thar leh hlawkna pakhat tal chhar chuak turin a chah a ni.

Zin turte thlahna puala inkhawm tawi buatsaihah hian Dr. C. Vanlalramsanga, Planning Secretary chuan Entreprenuer-te chu zin tur zinga thawkchhuak hmasa ber tur annih angin entawntlak leh hmasawnna tur tha an zirchhuah ngei a beisei thu a sawi a. Master Trainer-te chungchangah MEDMOC chuan tun ami te bakah hian a second batch tur nomination kalpui leh training dan tur a ngaihtuah mek thu a sawi bawk. Hun kaihruaitu Pu Lalrinchhana, Deputy Adviser, Planning Dept. leh MEDMOC Secretary ni bawk chuan entreprenuer-te chu an hmalakna theuhva hriatthiamloh emaw harsatna an tawh changin sorkarin a theih chin china puih a inpeih reng thu a sawi a ni.

Exposure Trip a kal tur hian a vaiin District hrang hrang atangin mi 53 thlanchhuah an ni a, tun tum ami hi a vawikhatna niin, tum thum kal tura ruahman a ni. He trip a kalte hi officer pathum in hruaiin, December ni 6-8 chhungin West Bengal a industries hmun hrang hrang fang kual tur a ruahman a ni.

IIM Calcutta Innovation Park-a Master Trainer-te hian ni 6 atanga ni 9 thleng training an nei ang a. He training hi Mizoram hmun hrang hranga entrepreneuship awareness neih nan a trainer-te buatsaihna a ni. Tuna Master trainer te hi MEDMOC in College leh University hrang hrang atanga zirtirtu a thlanchhuah te an ni.