Vawiin khan Champhai District Immunization Task Force Committee chu an Chairman Pu Vanlalngaihsaka IAS, District Bawrhsap ni bawk hovin a DC Conference Hall, Keifangtlangah an thukhawm a. Kum thar January thla lai hawl atanga Measles & Rubella (Sentut leh Thaksip) Vaccine pek beihpui thlak dan tur an rel.
Champhai District pumpui tuam anih theih nan Pu Vanlalngaihsaka Champhai DC chuan uluk taka naupang kum bithliah awm zat ziak lut vek turin line department a thawkte chu a chah a. Tumah hmaih loa chak taka ruahmanna kalpui anih theih nana thawkho zel turin a sawm nghal bawk a ni.
He Vaccine hi January ni 18, 2018 atanga pek tana ni 30 chhunga District chhunga nausen thla 9 atanga kum 15 inkar zawng zawngte pek vek tur a ni a. A tir hapta hnih chhung chu zirna in zawng zawngah pek tur niin, a dawt hapta hnih chhung chu vantlang/khawtlangah kalpui a ni ang a. A tawp hapta khatah chuan a thual nawnna Sweeping phase-a neih tur a ni ang.
He Vaccine pekna tur atana thawktute inbuatsaihna pawh arang lama kalpui tura ruahmanna siam a ni a. Naktuk atangin Training leh Workshop te, Sensitization Programme te pawh kalpui chhoh nghal a ni dawn a ni. Hemi hmalakna hnuaiah hian State Level, District level leh Block Level Committee-te a awm leh a ni.
India ram hi khawvela Sentut ( Measles) za zeal 36 awmna ram a ni a. Nuaibo anih theih nan hmalakna chak taka kalpui niin phase hnihnaah India rama naupang za zela 29 tuam tawh niin Mizoram chu Phase thumna hnuaia tuam tuma hmalakna kalpui mek a ni. Kum 2020 ah chuan India ram chu he natna awm tawh lohna a siam tum a ni. He natna vang hian kum tin naupang 50,000 vel thi ziah anga chhut a ni. He Measles and Rubella Vaccination hmalakna hi khawvela Public Health Programme lian ber tur a ni.
Vawiina Meeting-ah hian Dr R. Lianmawia, District Immunization Officer ( DIO) in kalkhawmte lawmna thu a sawi a. DR. Basu, Surveillance Medical Officer, WHO in presentation a pe a. He hunah hian District chhunga Health Deparment Office hrang hranga Officer te, line department hrang hranga hotute an tel a ni.
