Vawiin khan Mizoram Cooperative Apex Bank chuan Vana Pa Hall-ah Annual General Assembly vawi 23-na an hmang a, Shareholder Society hrang hrang atang palai thahnem tak telin he hun hi Cooperation Minister Pu Lalrinmawia Ralte chuan khuallian niin a hmanpui a ni.
Khuallian hian Assembly chhimtu palai kalkhawmte hmaah thu sawiin Apex Bank chu hnungtawlh lova hmasawn zawng zela a kal avangin a enkawltu Board leh hnathawktute chungah lawmhtu a sawi a, Bank hna chu hna pawimawh leh fimkhur ngai anih avangin harsatna lo thleng thei laka inveng fimkhur reng turin a chah a, Reserve Bank of India in Capital to Risk (Weighted) Assets Ratio (CRAR) 9% Bank te tana a bituk laia 9.18% an tlin chu lawmawm a tih thu leh a thawktute thawhrim rah liau liau ani tih a hriat thu a sawi a, Shareholders te chu Share a tam loh avangin Share lei belh lama thahnemngai turin a chah bawk.
Apex Bank General Assembly ah hian an Chairman Pi T.Lalmuanpuii leh Chief Executive Officer Pu Lalzuahliana ten Bank hmalakna leh hmasawnna chi hrang hrang an sawi a, Apex Bank ah hian kum 2015-2016 chhung khan sum deposit Rs. Nuai 59,202 niin Loan atan Rs. Nuai 40,038 an pe chhuak a, Mizorama Bank zinga CD ratio sang ber niin an deposit atanga loan pek chhuah hi 67.63% a ni a, kum kalta chhung khan Rs. Nuai 614.69 an hlep a ni.
Annual General Assembly ah hian palaiten rorelin Annual Report, Annual Statement of Accounts leh Profit semdarh dan ruahman te an pawm a, Mizoram Cooperative Societies Act hnuaia dan tihdanglam ngai leh hnathawktute Pension Scheme chungchang an ngaihtuah bawk a ni.
