Co-operation Department Minister Pu C. Lalrinsanga chuan vawiin khan Lunglei District Co Operative Union (LDCU) Office tlawh in an hmalakna leh an hmachhawpte a sawipui.

Lunglei District Cooperative Union President Pu Vanlalchhuangan kaihruaiin inkhawm tawi neih a ni a, Minister chuan thu sawiin Lunglei District hmun hrang hranga Co Operative Society engemawzat te khai dingtu leh enkawltu an nih angin LDCU te chu ruahmanna fel leh kalphung tha zawk kawh hmuhtu ni tura an intahhriam reng a tul tih a sawi a. Co Operative movement chawi nunna turah LDCU te chu a hmahruaitu ni tura inbuatsaih turin a fuihin Co operative Union of India kaltlanga Society te dawm kanna tur kawng pawh zirchiang a haichhuah dan ngaihtuah a nih tur thu a sawi bawk. 

Hei bakah hian Lunglei District Cooperative Union te hian Minister hnenah hian an kal zelna tura an mamawh leh tul hrang hrang an thlen a, Minister hian a tul anga chak zawk a hmalak a tum thu a sawi a ni. He hunah hian LDCU Board of Directors te leh Office hnathawktute an tel a, Minister Pu C. Lalrinsanga hnenah hian lawmpuina leh chawimawina thuziak an hlan nghal a ni.