2742/2022-2023
Lunglei the 21st November 2022 - Lunglei District Cooperative Union Ltd (LDCU) buatsaihin India ram hmun dangte rualin Lunglei District ah pawh All India Cooperative Week 2022 (November ni 14 atanga November ni 21) hman a ni a. Vawiin khan he Week kharna pual hian Art & Culture Conference Hall, Lungleiah hun hman niin Cooperation Department changtu Minister Pu C.Lalrinsanga chuan a hmanpui a ni. Kumin All India Cooperative Week vawi 69-na thupui hi "India @75: Growth of Cooperatives and Future Ahead" tih a ni

Vawiin program Pu RVL Chhuanga, President LDCU kaihhruaiah Cooperation Minister Pu C.Lalrinsanga chuan Cooperative te kaltlanga hmalakna hrang hrang te chuan kan ram economy a bulthut atanga a nghawng avangin hmasawnna daih rei leh mipuite tana chhenfakawm thlen thei tu a ni tiin State Level Federation leh LDCU hruaitute leh Department thawktute chu Cooperative Movement tan theihtawp chhuah chhunzawm zel turin a ngen a. All India Cooperative Week chu India ram Prime Minister hmasa ber Pandit Jawaharlal Nehru piancham hriatrenga atana kum tin hman thin anih thu sawiin Mizoramah pawh Cooperative Movement chak taka kalpui zel turin hmalak chhih mek a ni a, mi harsa zawk ten in leh lo an neih theihna turin Cooperative kaltlanga hmalakna Housing Federation te pawh kalpui leh tura hmalak mek anih thu a sawi a. Cooperative Federation leh Union hruaitute chu mipui mimir hmasawnna dah pawimawh hmasa tlat tur leh rinawm leh taima taka mipuite tan hna thawk turin a chah bawk a ni.

Vawiin program ah hian Lunglei District Cooperative Union Ltd (LDCU) President leh Vice President lo ni tawh te chawimawi niin Pu Lalremngheta, DCO Lunglei District chuan lawmthu sawina hun a hmang a ni.

Chawhnu lamah zirhona neih chhunzawm niin Pu Vanlalruata, Chairman MAHFED Ltd leh Pu Ngurthansanga Sailo, Managing Director MAHFED ten thusawina hun an hmang a. Pu MC Zomuana, Expert, Community Institution & Rural Livelihood, Green Agri Project; Pu Evan T Munsong DDM, NABARD; Pu Ramnunsanga, Work Manager, DRDO te Paper present in zirtirna an pe a ni.