2743/2022-2023
Kolasib dated 21st November 2022: Tukin khan Pu K.Lalrinliana, Minister of State, Food, Civil Supplies & Consumer Affairs Department leh Kolasib Assembly Constituency bialtu MLA ni bawk chuan Saidan veng, Kolasibah Health Clinic a hawng a. He hun hi Pu H.D.Lalawmpuia, VCP, Saidanin kaihruaiin Dr.RK Lalthlamuana, SMO hnen atangin report tawi ngaihthlak a ni bawk.

Minister Pu K.Lalrinliana chuan khawtlang hmasawnna tehfung pawimawh tak chu hriselna a nih thu leh hriselna tha nei tur chuan nu in nau a pai atanga tha tak a enkawl a pawimawh thu a sawi a. Khawtlang hriselna tih hmasawn a nih theih nan Kolasib Assembly constituency chhung ah Health Clinic 11 hawn thar a nih thu leh a dang 10 hawn leh tur a hmalak mek a nih thu a sawi. Kolasib district chhung mipuite leh district pawn lam tan pawh a pan manhla tak ni turin khum 100 awm theihna tur District Hospital thar sak hna thawh mek a nih thu Minister chuan sawiin MLA Fund hmangin Laparoscopy leh Dialysis khawl bun a nih bawk thu a sawi a, heng hmalaknate hi khawtlang mipuite hriselna tih hmasawnna tur a nih angin tangkai tak a hmang turin kalkhawmte a chah a ni.

Dr.RK Lalthlamuana, SMO tarlan danin Saidan vengah hian in 196 awmin mihring 982 vel awm ang a chhinchhiah a ni a, naupang kum 1 hnuai lam 20 bawr vel awm ang a chhut a ni bawk. Saidan veng mipuite hriselna uluk lehzual a vil a nih theih nana Health Clinic thar hawn a ni chu Dr.RK Lalthlamuana chuan lawmawm a tih thu sawiin Sawrkar laipuiin Polio dona beihpui a thlak mek ah hmanraw tangkai tak a nih ngei a beisei thu a sawi bawk a ni.