2744/2022-2023
Aizawl 21st November 2022: Vawiin khan Mizoram Pharmacists' Association huaihawtin DHME Conference Room, MINECO-ah 61st National Pharmacy Week denchhena buatsaih Seminar on Development of Pharmaceutical Sciences in Mizoram chu Health Minister Dr. R. Lalthangliana'n hawngin National Pharmacy Week hawnna hun a hmang nghal bawk.

Khuallian Dr. R.Lalthangliana chuan thu sawiin damdawi hriatna lama mithiam, Pharmacist te mawhphurhna chu khawvel hmasawn zelah a pawimawh a, natna enkawl nana damdawi lei tur dik leitir chungchangah te, mipuite lo puitu leh mipui hriselna atana thui tak sulsutu leh damdawi dik ei kawngah hlawk taka thawktu an ni a ti a. Khuallian chuan damdawi chungchangah mipui kan thang harh mek zel a, damdawi nih phung, a hnathawh leh a nghawng te, a ei dan tur dik te hi mipui leh damdawi hmangtu te zirtir hi kan mawhphurhna pawimawh tak a ni a, chuvangin damdawi hriatna kawngah pawh hma kan sawn a kan inchhiar zaute pawh a tul zel a ni tiin a sawi.

He hunah hian Implementation of Pharmacy Practice Regulations, 2015 (Amendmend, 2021) chungchang sawihona neih a ni a, MZU a Pharmaceutical Science Department hawn a nih theihnan hmalak dan tur sawiho a ni bawk a.

Khuallian hian Mizoram State Pharmacy Council Office tur atana hmun awl remchang Seminar zawhah hian a hmunah kalin a en nghal a ni.

He hunah hian Principal Director Dr. T.Lalhmangaihi, Joint Director, Drug Controlling Authority Pu Lalsawma leh Aizawl Civil Hospital leh RIPANS atangin Minister hi an tawiawm a ni.