Mizoram Urban Cooperative Development Bank Ltd. (MUCO Bank Ltd.) chuan vawiin chawhma dar 11.00 khan Engineers’ Club, Babu Tlang-ah annual general conference vawi 20-na an hmang a; Cooperation Department Minister Pu J.H. Rothuama chuan he khawmpui hi a hmanpui a ni.

Pu J.H. Rothuama chuan MUCO Bank Ltd. din a lo nih dan leh a thiltumte a sawifiah a; “Kum 1988, August thlaa he bank din dawna kan duhthusam ang kan phak loh chhan chu he bank-a share-holder ten hun kal zelah a neitute kan nih anga kan rilru kan sen tawk loh vang leh pawisa dahna atana kan hman tawk loh vang a ni thei ang” a ti a. Bank atanga loan lak chungchanga Mizo mipuite rilru puthmang chu siamthat tul a tih thu sawiin Minister chuan, “Paiwsa puk rulh letna lamah kan inthlahdah em em a; loan hi a thlawna sum kan hmuh – grant – emaw kan titlat thin a; hei vang hian Mizoram-a bank hrang hrangten harsatna an tawk thin a ni” a ti bawk. Cooperative Bank leh society-te chu Mizoram hmasawnna tura an huang zauh deuh deuh tura fuihin, “NLUP pawh hi a hlawhtlin tak tak hunah chuan cooperative society-te leh cooperative bank-te hian kan huang kan zauh thiam a tul dawn a. Kut-hnathawktute thil dehchhuah lei leh hralh kawngah pawh a sulsutu kan nih a pawimawh em em dawn a ni” a ti bawk.

Pu Lalpekliana, Registrar, Cooperative Societies pawhin thu sawiin, “Society-a kan intelkhawm chhan ber chu eizawnna inangte tangruala kan inkhaichhuah hi a ni a. Hetiang taka tan kan lak thiam chuam cooperative movement hi kan ram tana chhenfakawm lehzual turin kan kalpui thei dawn a ni” a ti.

MUCO Bank Ltd. hian kum 2011-12 chhungin mi 327 hnenah loan cheng nuai 697 a pe a; loan rulhna nuai 319 a hmu let bawk. An hnena sum dah pawh cheng nuai 582.53-in a pung a ni. An hnena pawisa chhunluh zawng zawng hi DICGC-ah insure vek a ni a; he bank pawh hi a puma insure a ni bawk. Reserve Bank of India-in uluk takin a vil a; Govt. of India Security-ah pawh cheng vaibelchhe engemaw zat an dah tawh a ni. Tunah hian core-banking ti thei turin tan an la mek bawk. Kum 2011-12 chhungin MUCO Bank Ltd. hian cheng nuai 30 a hlep a ni.

Vawiina an khawmpui hi Pu R. Liantluanga’n a kaihhruai a; chawhnu lamah Board of Directors mi 7 thlanna hun an hmang a ni.