Ni 2 chhung awh tur, All Mizoram Women Federation in a Capacity Building Workshop for Leaders & Functioneries of Women NGOs, I&PR Conference Hall-a vawiina a buatsaih chu Chief Minister Pu Lal Thanhawla chuan hmanpuiin, AMWF Website thar www.amwfindia.org a tlangzarh nghal.

Chief Minister chuan Mizoram leilung fate zinga hnam chitin hmeichhiate inthlunkhawmna pawl, AMWF in hmeichhiate thiamna leh theihna ti chak tura hetiang workshop a buatsaih chu a lawmawm hle a ni a ti a.Mizorama chengte chu a leilung fate vek kan nih angin a neitu kan nihna a inchen vek a ni a ti a. He pawl, hnam chitin lenna pawl a ding hi a lawmawm takzet a ni a ti.

Mihring hmasawnna tehnaah hmeichhiate te tan lak ala ngai hle a ni tiin, Chief Minister chuan ram pum tan First Five Year Plan atangin sorkar pawhin hmeichhiate tan hma a lak tan thu a sawi a.Hmeichhiate inenkawlna bik tur Women Empowerment pawh siam hran a ni a ti a. Tuna worshop hian bitum bik neia heitiang hun a buatsaih chu thil tangkai tak tur a ni tiin, UPA sorkar pawhin hetiang target group bik siam hi tha a ti a ni a ti a. Sorkar pawhin hetiang lam hawi hian state training policy te siam turin a inpuahchah mek a ni a ti a. Skill Development Centre pawh din chhoh tum a nih thu a sawi bawk a. Khawvel thang chho zel mila kan intuaihriam ve zel hi angai a ni a ti. Thiamna leh theihnate tih chak chhoh zel anih theih nan Sikkim State chuan Sikkim Institute of Capacity Building an neih thu a sawilang bawk a ni.

Chief Minister chuan hmeichhia te hi ram rorelna sanga mipui aiawha dah ve chungchang a sawiah, Mizoram chu mipa awpna, male dominated anih avangin, hmeichhe fel leh thiam tam tak awm bawk mahse, mipate ngaihtuahnaah leh duhdanah mipui aiawha dah chu a tlak nat loh avanga tih la harsa nia a hriat thu a sawi a. Parliament-ah pawh Rajya Sabha ah hmeichhe tan reservation passed mahse Lok Sabhha ah a tlang theilo a ni a ti. Chief Minister chuan Mizoram hmeichhiate dinhmun chawikanna kawngah workshop hi a kawng pakhat anih ngei a beiseiawm a ni a ti a. Workshop-in rah tha tak a hmuh ngei theih nan duhsakna a hlan a ni.

Chief Minister tawiawmtu, a nupui Pi Lal Riliani pawhin thusawina neiin, vaihlo in mihringte hriselna a tihchhiat theihzia uar takin a sawi bawk a ni.

Workshop hawnna hi AMWF President Prof. Lalneihzovi’n a kaihruai a. Chawhnu lamah mithiam ten zirhona an kaihruai a, naktukah workshop hi a tiak ang.