Vawiin khan Sports Authority of India (SAI) hnuaia Special Area Games (SAG) Centre building, Chite Veng chu Sports & Youth Services Minister Pu Zodintluanga’n a hawng. Hawnna inkhawm hi Sports & Youth Services Director Pu Lalzirmawia Chhangte-in a kaihruai a, Sports Sercretary Pu R. Lalvena, Sports Council Secretary Pu Lianzuala bakah Sports Department leh Sports Council officials engemawzat an tel a ni.
Sports Minister Pu Zodintluanga chuan hun rei tak atanga nghahhlel tawh SAI Extension Centre hawn a ni ta chu Mizoram atan mellung pawimawh tak a tling a ni, a ti. Mizo thalaiten talent tha tak an nei a, an mamawh bungrua, thawmhnaw, infiamna hmun leh training uluk taka pek an nih chuan hlawhtlinna an hmuh zel a beisei thu sawiin Minister chuan kum chanve chhungah pawh naupang talent nei tha an enkawl ten state, national leh international level-ah medal an hawn thei a ni, a ti bawk. State dangah chuan SAI-in sawisel hlawh thin mahse Mizoramah chuan SAI hnuaia enkawl infiammite chu an hlawhtling zel a, SAI hnathawh leh hmalakna te chu a fakawmin a chhuanawm a tih thu a sawi. Khawvel pumah sports inkaihruaina, kalphung leh training pek dan te tihdanglam a nih rualin Mizoram-ah pawh hemi mila kan inher thiam vat a tul a, vawiinah bul kan tan fuh chuan kan hna chanve chu kan thawk zo ang tluk a ni, a ti bawk. Sorkar Laipui atangin Mizoram District 8-a Sports thawmthat leh tihhmasawn nan cheng vaibelchhe 17.70 dawn a nih thu sawiin Pu Zodintluanga chuan he sum hi sports disipline awm sa te tihchangtlun nan an hman mai bakah Mizoramah la uar loh, sports disipline thar enegmaw zat bultan nan hman tur a nih thu a sawilang bawk. Sorkarin mipui leh a bik takin thalaite mamawh hriain, chak taka hma a lak zel ang hian mipui leh thalai lam te pawhin sorkar thlawp thiam a, theihtawp chhuah turin a chah a ni.
Sports Secretary Pu R. Lalvena chuan SAI trainees te fuihna thu sawiin talent neih inang rau rau ah pawh a taima fal, tei rei peih, tumruh leh beidawng duh lo te chuan hlawhtlinna pawh an hmu bik a nih tih hre reng turin a chah. Hlawhltinna leh hmasawnna hmu tur chuan tanrualna, intanpui tawnna leh inchawisan thiam a pawimawh fo tih a sawi bawk.
SAI Asst. Director Pu Lianminthang chuan Report pe-in, SAI Extension Building, Chite chu 30 November, 2011 khan SAI kutah hlan a ni a, tunah hian Table Tennis training lai mek 8 leh Football training dawng mek 22 an enkawl thu a sawi a. Hmun indaihlohna avangin Boxing trainees 8 te chu SAI, Mission Vengthlang-ah enkawl mek an ni thung. Nikum SAI Secretary Pu Gopalakrishnan-in Mizoram a lo zin khan Chite-a SAI Centre chu tlawhin a hmun leh an hmalakna a fak hle a ni, a ti a. SAI Extension Centre hi Lunglei-ah pawh hawn ni tawhin Wrestling, Boxing, Judo leh Taekwondo training pek tura ruahman a ni tih a sawi bawk. SAI Trainees te hi mi 1 zelah Rs.55,000 sen a ni a, hei hian an boarding, sports kit, competition fee, education, medical leh insurance te a huam tel vek a ni.
