Mizoram Cooperative Fish Farming Marketing and Processing Federation Ltd. (ZOFISFED) chuan vawiin khan I&PR Auditorium-ah Annual General Assembly an hmang a. Fisheries Minister thar Pu R. Lalzirliana’n a hmanpui.
Vawiin a Assembly hawnna inkhawm chawhma lama neih hi Pu Thanchungnunga, Chairman, ZOFISFED Ltd chuan a kaihruai a. Assembly hmanpuitu Fisheries Minister Pu R. Lalzirliana chuan Mizoram chhunga sangha a intodelh piah lamah state dang a thawn chhuak theih khawp a hma la turin sorkar chuan ZOFISFED te hi a ring tawk a, amaherawhchu dikna, rinawmna, taimakna leh department nen inthurual taka an kal erawh a pawimawh ber ang a ti. Pu Lalzirliana chuan mipui mimir tana hmasawnna leh thil chhenfakawm hlen chhuah chu sorkar thil tum ber a nih avangin kawng engkimah rinawmna a pawimawh thin a ni a tiin sangha khawi a eizawnna siamtute tan pawh sangha chi tha leh hrisel a pawimawh hmasa ber a. Chuvangin sangha chi supply tute pawhin dik taka an pek theih nan tun atang chuan uluk leh chik zawk a enngun tum a ni a ti. Departmnet hrang hrang te pawh in an hnathawh zarzo tu leh an thawh chhan te ngai pawimawh lehzual thin se a duh thu a tarlang a. ZOFISFED hruaitu leh member zawng zawngte chu anmahni pawl chhunga mimal hlawkna leh therhlo um lo tur leh ram leh mipui hma khua thlira hma la tu an nih in hre reng turin a chah a ni.
Vawiin inkhawm ah hian ZOFISFED Managing Director thar Dr. O.P. Singh pawhin he pawl hmalakna tlangpui leh hmachhawp a tarlang a. Mizoram sorkar hmachhawp lian ber NLUP a ZOFISFED hnathawh tur tlangpui pawh Assembly palaite a hrilhfiah a ni. Fisheries Department Director ni mek Pu Dotawna chuan Mizoram chhunga sangha khawi hlawk theih dan leh a chhenfakawm dan tarlangin state pumah hian sangha dil siam theihna hmun 24000 Hectares lai a zau a awm laiin tun dinhmun ah 4000 hectares ah chauh buatsaih a nih dan a tarlang.
Assembly hawnna pual inkhawm ah hian Cooperation Department atanga thusawitu Pu Sanghlira, Dy. Registrar chuan State Level Society te mawhphurhna leh kalphung tur tlangpui a hrilhfiah a. ZOFISFED Chairman chhuak ta Pu F. Lalnienga pawhin an pawl member te tana fuihna thu tangkai tak tak a sawi bawk a ni.
Vawiin Assembly chawhnu lam chu an Chairman kaihhruaina in rorelna hun atan hman a ni a sangha thar chhuah hma a hmasawnna ruhrel buatsaih nana, sorlai laipuiin Mizoram sorkar Fisheries Department kaltlanga 100 % grant, ZOFISFED hnena a pek chungchang a taka hman a nih theihna tur atana ruahmanna siam a sawiho a ni a. An pawl hmalakna leh kalphung hrang hrang inhrilhfiahna leh zawhna leh chhanna hun te nen hun hlawk thlak tak an hman a ni.
