Aizawl Zonuam YMA Branchin vawiin khan kum 25 an tlin, Silver jubilee lawmna Primary School kawtah pandal sa in lawmna inkhawm an buatsaih a, Chief Minister Pu Lal Thanhawla chu khuallian a ni. Inkhawm tan hma hian kum 25 tlin hriatrengna lungphun Chief Minister hian a hawng hmasa a ni.

Chief Minister chuan Zonuam YMA te leh khawtlang mi zawng zawngte chu lawmna chibai a buk a. Khawtlang mite chezia chu khawtlang tangrual an ni tih a hmuh theih a ni a ti a. Mizote hi Pathian mithmuhah vohbik kan ni tih in hria a, khawi hmunah pawh a chanchin tha hril tura koh kan ni a ti a. Chuvangin kan awmna apiang hi a rawngbawl tura min dahna a ni tih hriain, eng hna pawh thawk ila thahnemngai tak leh Amah tih chunga, tui tak leh rinawm taka kan thawh hi kan tih tur a ni a ti a. Chanchin Tha kan hril chhung chu tumahin min chimral a hlauhawm lovang a ti.

YMA chu tha taka an mawhphurhna keng tlang thin an ni tiin, Chief Minister chuan sorkar nen pawh thawhdunna tha tak, ramngaw, thing leh mau humhalh kawngah te, nungcha, chungleng sava leh lui tui sangha humhalhna lamah te kan nei a ni a ti a. Pathian thil siam tichhe zawng leh tichereu zawnga chet hi Amah zah lohna a ni a ti.

Chief Minister chuan YMA hi sorkar kut ke tha takah an awm a. Mizo zingah ngei chi bil zawnga kal an lo chhuak zel a, heng mite hi Mizo pawi sai, sorkar pawi sawi an ni a. Chuvangin ram leh hnam thilah chuan chak takin kan tangrual ngam tur a ni a ti a. Min thendarh tuma, min sahthlak tumtute lakah kan tanrual angai a ni a ti.

Corruption chungchang a sawiah Pu Lal Thanhawla chuan corruption hi sorkar sum eirukna ringawt hi a nilo tiin, thatchhiatna te, zelthelnate, inthlahdahna te leh kuttling lova sum hmuh tumna te hi corruption vek a ni a ti a. Kan zavai hian a chhelai siam tha tu tur vek kan ni a ti.

Zonuam khawtlangin Primary School hmun chu community hall atana an duhthu Chief Minister hnena an thlen chu Education Minister hnenah chak taka lo recommend a tiam a. Inkhawmah hian Chief Minister hian silver jubilee lawmna cake chhawng thuma siam chu a zai bawk a ni.

Zonuam YMA Branch hi ni 23. 6.1987 khan alo piang a. Hemi hma zawng hian Luangmual YMA Branch hnuaia section pakhat a ni thin a ni. Chuta tang chuan Luangmual Vengthar Branch invuahin, Central YMA in ni 23.6.1987 khan Branch puitlingah a pawm a. Kum 1999 khan a veng hming tharah Zonuam veng tih alo nih tak avangin Zonuam Branch YMA tih alo ni ta a ni.Tunah hian YMA member 1460 vel an awm mek a. Silver Jubilee lawm tur hian kum 2008 atang khan chet an la tan a, kumin February thla atang khan kum 25 kum a tlin lawmna pakhat atan thisen pek te, section sports neih te, lam leh zaia intihsiak leh hla leh essay inelnate an buatsaih bawk a ni.

Lawmna inkhawm hi an YMA President Pu P.C.Hrangkunga’n a kaihruai a ni. Vawiin a lawmna pui ber ni hian ran lu kimin khawtlang huapin jubilee ruai an theh a ni.