Vawiin chawhma dar 11.00 khan Mizoram State Co-operative Union (MSCU) chuan General Assembly vawi 25-na Archives Hall, Babu Tlang-ah an hmang a; he khawmpuiah hian Co-operation Minister Pu J.H. Rothuama chu khuallian a ni a; Mizoram Co-operative Tlangau chanchinbu special issue a tlangzarh nghal bawk.

Pu J.H. Rothuama chuan, “Co-operation hi a hming atang rengin tanrualna leh thawhhona a ni a; mi dangte nena lungrual taka kan thawhho hian mimal leh chhungkuaa kan tih theih loh thil ropui tam tak kan ti thei thin a ni. Chuvang chuan, ram changkang zawkah chuan Co-operative society-te hi ram leh mipuite economic din hmun sawh nghettu leh harsatna lian tham atang pawha khaichhuaktu pawimawh tak an ni thin a; sawrkar atanga sum leh paia tanpuina kan dawn piah lamah, mahni intodelh chunga midangte tana eizawnna tha siamsak hi kan tum bulpui a ni tur a ni” a ti. Co-operation Minister chuan MSCU hnuaia society hrang hrangte chu sum peipun leh vawn dan te, hak zauh zel dan tur kawngahte inzirtir uar a tul thu sawiin, “Mizoram-a kut hnathawktute zingah mi taima tak tak, an remhriatna in atlin loh avanga kaihhruai ngai tam tak an awm a. Anmahni chemkalna zawn theuhah leh an tlakna leilung leh sik leh sa mila eizawng thiam tura society-ten kan zirtir a ngai a. Hemi kawngah hian chak lehzuala hna kan thawh theihna turin Mizoram sawrkar chuan inthlan hma a kan lo tawng/tiam tawh angina Co-operative Development Council din ngei tumin theihtawp kan chhuah mek a ni” a ti bawk.

Vawiina Mizoram State Co-operative Union inkhawmpui hi an pawl President Pu Lalnunsanga chuan a kaihruai a; Pu J. Ramliana, Chief Executive Officer chuan kum khat liam ta chhunga MSCU hnathawhte a sawi. MSCU hi Co-operator intelkhawmten ni 29.3.1975 khan an din a; Mizoram chhunga Co-operative Society-te hmasawnna tura kaihhruai chu a thil tum bulpui ber a ni a; tunah hian member Society 479 an awm a ni.