Kum 2011 chhunga Mizorama khawfai, ekin nei tha khua 53 thlan chhuahte hnenah vawiin khan Nirmal Gram Puraskar (NGP) Award Chief Minister Pu Lal Thanhawla chuan Synod Conference Centre ah a sem.

Chief Minister chuan central sorkarin thingtlang mite hriselna leh faina a ngaihpawimawh avangin rural developmentah sum, defence budget deuhthaw a dah a ni a ti a. NGP Award sem tur pawh hian India President ngei sem tirin, state ah chuan Chief Minister emaw Governor emaw in President aiawhin an sem thin a ni a ti a. Kum hmasa dang aia kum 2011 chhunga lawmman dawng thei khua tam tak a awm ta chu a lawmawm hle a ni a ti.

Chief Minister chuan hmarchhaka chengte zingah zunram thiar thuah Mizote hi kan hnufum bik deuha a hriat thu a sawi a. State dang, a bikin Meghalaya ah chuan khawlaiah zun zung hmuh tur, abikin hmeichhiaah hmuh tur an awm ngailo a ni a ti a. Aizawl leh Lengpui Airport inkara kawngsira hmeichhe kawr ha manglo leh mipa kopanga zung tur tur hmuh tur an awm fo mai chu sorkar ang pawha engtia tih tur nge ni ang tiin ngaihtuahna hman anih thin thu a sawi a. Hei hi pawnlam atanga lokal ten an thil hmuh hmasakte anih thin avangin insiam that angai hle a ni a ti. Faina leh thianghlimna lamah inzirtir angai fo mai hi ringtu kan nih angin kan inbihchian a pawimawh hle a ni a ti.

Khualzahawm Pu S.Hiato, Minister for PHED chuan khaw fai lawmman lakah duh tawk mai lo turin a dawngtute chu a chah a, faina lama bul kan tanna chauh a ni a ti. Minister chuan chhung tinin ekin kan neih vek a tul thu sawi bawkin, ekinah chauh inthiar tur a ni tih kan hriat thar fo a tha a ni a ti.

Nimal Puraskar Award hi zun leh ek lama faina, sanitation ah thlan ani ber a. Khawtina chhung tin bakah School, Anganwadi thlenga ekin tha nei an ni tur a ni a. Hei hi Total Sanitation ina a tum ber pawh a ni a,mitinin invawnfai duhna thinlung put tira inthiarna tha hman tir vek chu a thil tum lian ber a ni.NGP hi India President in kum 2005 atang khan kum tin a hlan thin a. A lawmman hi khaw mipui tam dan azirin Rs.50,000 atanga Rs.5,00,000 thleng a keng tel a ni.Pawisa fai an dawn hi khaw hmasawnna tur tam tak, tuikhur siamte, tui luankawr siam leh vantlang ekin siam nante a hman tur a ni.

NGP Award 2011 chhunga lawmman dawng khua te hi Aizawl district ah 5, Champhai district ah 4, Kolasib District ah 4, Lawngtlai district ah (vawi khatna) 1, Lunglei dist ah 18, Mamit ah 9, Saiha ah 2, leh Serchhip ah 10 an ni a, an vaiin khaw 53 an ni. Kum hmasa lam 2007 ah khaw 3 in an dawng a, 2008 ah khaw 8 in, 2009 ah khaw 20 in leh 2010 ah khaw 5 in an lo dawng tawh bawk a ni.

Lawmman semna inkhawm hi Pu C.Lallunghnema, Jt. Secretary, PHED in a kaihruai a, lawmna thu a sawi ah NGP hi kum April thla atang khan Nirmal Bharat Abhiyan tia thlak anih thu a sawi.

Chief Minister hi a nupui Pi Lal Riliani’n a tawiawm a ni.