Nimin khan Deputy Speaker Pu John Rotluangliana chuan Tuirial Constituency-a Kawnpui VC II hman tur Bharat Nirman Rajiv Gandhi Seva Kendra Building a hawng a. He building hawnnaah hian Bialtu MLA leh Youth Commission Chairman ni bawk Pu Hmingdailova Khiangte leh KVI Board Chairman Pu K. Lianzuala te’n an tawiawm a ni.

Hawnna inkhawmah hian Deputy Speaker chuan building hi sorkar ta ni lova mipui ta a nih thu a sawi a. Sorkarin mipuite hman tura thil a tih sak reng rengte chu mahni ta anga en nachang kan hriat loh avang hian thil tha tak tak hman tlak lohin kan chhuah tawh a, mipui hian neitu thinlung kan pu ngai lova, hei hi kan siam that a ngai a ni tiin Pu John Rotluangliana chu he in thar pawh hi mipui ta a nih angin duat taka enkawl turin a chah a ni.

Thu a sawi zelnaah Pu John-a chuan NLUP hi khawsak harsa zawkte lei rem rahna tura sorkar Kolasib district-ah ringawt pawh NLUP atanga tanpuina dawngtu hmunphiah chingtute chuan nikum chhung khan Rs 195 lakhs an la lut a, hei hi a ropui hle a, hetiang bawkin taima tak leh rinawm taka thawkte chu an dingchhuak ngei ang, a ti.

He Kawnpui VC II BNRGSK Building sak nan hian Rs 9.66 lakhs ruahman a ni a, mahse a sakna tur hmunte lei chawp a ngaih vang leh a In hawi zawng siam that leh te a ngaih avangin DRDA Kolasib chuan Rs 1.7 lakhs a pek belh leh a, avaiin Rs 11.36 lakhs sen a ni.

Kawnpui hi Thingdawl RD Block hnuaia awm niin he RD Block-a BNRGSK Building 16 sak tur te chu tunah hian sak zawh vek an ni tawh a. Nimin vek khan Bialtu MLA Pu Hmingdailova Khiangte chuan Kawnpui VC I BNRGSK Building thar a hawng ve leh bawk a. Vawiin hian Bialtu MLA hian Block BNRGSK Building Thingdawl ami a hawng bawk.