Vawiin khan Mizoram State Agriculture/Horticulture & Marketing Cooperative Federation Ltd (MAHFED) chuan an General Assembly vawi 16-na Archive Hall, Babutlang-ah an nei a, Cooperation Minister Pu J.H.Rothuama chu Khuallian a ni.

Minister Pu J.H.Rothuama chuan ramchhung sum leh pai dinhmun tingheh nan leh a than zel nan Cooperative Society-te hi an pawimawh hle a, ram changkan zawkah te phei chuan thil dehchhuah leh hralh chhuah tur (entir nan : bawnghnute, etc.) phei chu Cooperative atanga mipuiten an lei a tam ber zawk a ni, a ti. Tun dinhmunah Mizoram-ah Cooperative pawimawhna la hrethiam lo mahila, hun rawn kal zelah mipuiten Cooperative kaltlangin thil tam zawk leina chang an hria ang a, mipui mamawh tam takte chu hmun dangte ang bawkin Cooperative dawrah hralh a nih ngei a beisei thu a sawi a. Mizoram chu boruak, sik leh sa tha leh thianghlim tak a nei avangin leitha leh tuia kan hausakna te tun aia hmang tangkai a, loneitute pawhin hralh theih tur ang chi - hmunphiah, serthlum, kuhva etc. - lampang uar deuh deuh nachang hria se a tih thu a sawi bawk. Mizoramah Cooperative Council din a nih theih nan hmalak a nih mek thu sawiin Minister chuan Council-in Cooperative hrang hrang leh an kalphung te an khaikhawm theih hunah chuan tun aia nasa taka hma an sawn ngei a beisei thu a sawi a. Sum leh leilung hausakna engzat pawh neih ila, a pawimawh zawk ber chu a rama cheng mihring te an ni a, heng kan ram hausakna te kan hman dan a zirin hmasawnna rah pawh kan seng ngei ang, a ti.

Cooperative Societies Registrar Pu Lalpekliana pawhin thu sawiin Cooperative-ah hian thalai zawkte tui tir a, hman tangkai a tul hle a ni, a ti a. Tunlai Computer Age mila Mizoram Cooperative kalphung pawh kan thlak danglam a, kan thalaite thiamna kan chhawr thiam hi a tul tawh a ni, a ti. Cooperative te hi sorkarin bultan nan a tanpui thin a, amaherawhchu sorkar atanga sum hmuh ringawt tum lovin mahni intodelh leh hlawk zawk tura an thil hralh leh kalphung siam a pawimawh hle a ni, a ti a. Sorkar Laipuiin Cooperative chak lo zawkte khaichhuah nan Short Term Credit Structure a ruahman tur thu sawiin Pu Peka chuan Mizoram pawhin hei hi chhawr tangkaia Cooperative te thawmthat nan hman a nih tur thu a sawi a ni.

MAHFED Ltd. Managing Director Pu P. Bhattacharjee chuan kum 2011-2012 Report pein hemi hun chhunga an Net Profit chu Rs.3,27,210.84 a nih thu a tarlang. MAHFED hian sumdawnna chi hnih a kalpui mek a, chung chu Leitha (chemical) zawrh leh Sales Emporium te an ni a. MAHFED chu sorkar phalnain Mizoram pumpui atan Fertilizer Stockist an nih hnuah Zuangtui, Neihbawih leh Ramhlun vengah Leitha zawrhna dawr an hawng a ni. May ni 25, 2011 khan Sales Emporium changtlung tak hawngin, tunah hian MAHFED chuan loneitute mamawh bungrua (farm equipments) hrang hrang man tlawm zawkin an hralh chhuak mek a. Kum 2011-2012 chhunga Sales Emporium atanga an sum hmuh zat chu Rs.19,57,617.75.75 a ni.