Dated Aizawl, the 23rd July 2026: Vawiin khan Mizoram State Cooperative Development Council chuan Cooperation Minister Pu PC Vanlalruata pisaah meeting an nei.

Cooperation Minister Pu PC Vanlalruata chuan meeting hmasa ber tihlawhtling tura member-te kim taka an lo kalkhawm thei chu lawmawm a tih thu sawiin, Mizoram State Cooperative Development Council chu a hming maia din ni lovin, a taka cooperative sector hmasawnna tura din that leh (reconstitute) a nih thu a sawi. Cooperative society-te than zel na turin theihtawp chhuah theuh turin member-te chu a fuih bawk a ni.

He meeting-ah hian Mizoram Cooperative Sector-in hma a sawn theihna tur hrang hrang sawiho a ni a, district thar pathum - Saitual, Khawzawl leh Hnahthial-ahte District Cooperative Office hawn a nih theih dan tur leh Mizoram-a Institute of Cooperative Management din a nih theihna tura chak zawka hmalak dan tur te sawiho a ni bawk. MULCO tihchangtlunna tura bawng 100 lakluh dan tur hmalakna kal mek thlir niin, M-PACS te hmasawnna tura fertilizer license tam zawk neihna tura hmalak zel dan tur sawiho a ni.

PMBJAK (Pradhan Mantri Bhartiya Jan Aushadhi Kendra) initiative hnuaiah damdawi man tlawm zawka zawrhna pakhat awm chu Cooperative society kaltlanga hawn belh a nih theihna tura hmalak dan tur ngaihtuah a ni. State Level Cooperative Federation hrang hrang tihchangtlun dan tur leh Cooperative Development Council office neih theihna tura tul angte ngaihtuah a ni bawk.

Vawiin meeting-ah hian Pu VL Zaithanzama, MLA chu Vice-Chairman niin Pu K. Hrahmo, MLA leh Pu K. Laldawngliana, MLA-te member an ni bawk. Mizoram State Cooperative Development Council member hrang hrang, sawrkar hruaitute leh private member te an tel bawk.