2006/2024-2025

Dated Aizawl, the 11th September, 2024: Vawiin chawhnu dar 1:00 khan Cooperation Minister Pu PC Vanlalruata chuan RCS Office ground floor, Babutlang, Zarkawt, Aizawlah Mizoram VDVK Outlet a hawng.

Hawnna puala RCS Meeting Hall-a programme buatsaihah Khuallian Pu PC Vanlalruata chuan thu sawiin, Department hnuaia Federation-te chu tunlai khawvel hmasawnna thang zel mila an kal leh an inherrem zel a pawimawh thu a tarlang a. Khawvel khawi ramah pawh, Federation leh Cooperative Society-te an changtlunna apiang chu ram nuam leh hmasawn chak ber berte an ni zel tih a sawi a. Hei bakah hian Minister chuan ramin hma a sawn tak tak theihna tur chuan Federation leh Department-te thawhhona tha chu thil pawimawh ber pakhat a nih thu tarlangin, hemi atan hian inrawnkhawmna mumal tak la buatsaih a tul tih a sawi a. Federation-te chu Sawrkar thar 'Kalphungthar' thlen tura thawhpuiah a sawm a ni.

He hun hi Pu R. Lalremsanga, Registrar, Cooperative Societies, Mizoramin kaihruaiin kalkhawmte lawmna thu a sawi a. Hemi hnu hian Pu H. Vanhlupuia, Deputy Registrar, Cooperation Department, PMJVM Nodal Officer ni bawk chuan Mizoram VDVK Outlet chungchang technical report a pe nghal a ni.

Pradhan Mantri Janjatia Vikas Mission (PMJVM), Van Dhan Mission tih bawk hi Mizoramah chuan 23.01.2020 atang khan Cooperation Department chuan a kalpui tan a, he scheme hi 27.03.2023 atang khan Central Sector Scheme a ni tawh nghe nghe a ni.

He Scheme hnuaiah hian Van Dhan Vikas Kendra (VDVK) 259 din tawh niin, heng VDVK-te hnenah hian training bakah hmanrua leh chakkhai an mamawh angte a thlawn vekin pek an ni a. Heng operational VDVK-te thil siam chhuah hrang hrangte pho chhuah sak hi Cooperation Department chuan a ngaipawimah hle a. Tunah hian a bul tan nan VDVK 32 te thil siam chhuah hrang hrangte chu la khawmin heng thil siam chhuahte a tul anga pho chhuahna atan hian RCS Office ground floor-ah Mizoram VDVK Outlet hi siam a lo ni ta a ni.