2007/2024-2025

Dated: Mamit the 11th of September, 2024 : Vawiin chawhnu khan ANM School Auditorium, Mamit-ah 11th State Anti Tobacco Day puala hun hman a ni a, Pu Jacob Lalawmpuia, District Bawrhsap chu Khuallian niin hun a hmanpui.

He hunah hian Bawrhsap chuan ANM zirlaite chu zuk leh hmuam dona kawngah hmalatu pawimawh tak an nih thu sawiin, chhungkua leh khawtlang mai ni lo Mamit district tan danglamna thlentu an ni thei a ti a. Zuk leh hmuam simna tura kan tih theih hmasa ber chu kan thil tih pawm (self acceptance) hi a ni a, kan in pawm chuan hmasawnna kawng hmasa ber kan zawh a ni a ti. Pu Jacob Lalawmpuia chuan tun hma chuan puipunnaah meizuk nasat kan hrat thin a nimahsela khawvel lo changkang chho zelah leh dan in a min phuar vang te pawhin mipui awm tamnaah zuk leh hmuam tih kan sim chho tan zel a, hma kan sawn zel a ni a ti, hemi kawnga nasa taka hma latute kan health workers thawhrah zar a ni a ti. Natna tam tak laka inven nan zuk leh hmuam laka kan fihlim hi a tul a, kan taksa leh kan rilru hriselna thleng a nghawng thei avangin kan tih loh hi a pawimawh a ni a ti a. Bawrhsap chuan ANM zirlaite chu zuk leh hmuam do kawng a mi pawimawh an nih avangin mahni invawng leh fai taka inenkawl a, zuk leh hmuam laka fihlim turin a chah a ni.

Vawiin hun hi Dr Lalhlunpuii, Senior CMO chuan a kaihruai a, Dr Nancy Lalnunmawii, District Consultant, National Tobacco Control Programme (NTCP) Mamit chuan zuk leh hmuam chungchangah presentation a nei bawk.

State Anti Tobacco Day hi Mizoram district hrang hrangah hman thin a ni a, tun kum a thupui (theme) chu “ Zuk leh Hmuam laka fihlim Thalaite” (Tobacco free youth) tih a ni.