3680/2023-2024

Aizawl, the 6th February, 2024: Vawiin chawhma dar 11:00 AM khan Pu P.C. Vanlalruata, Cooperation Department changtu Minister chuan Registrar of Cooperative Societies (RCS) Office, Babutlang chu tlawhin, department official-te nen inkawmna hun an hmang.

Cooperation Minister Pu P.C. Vanlalruata chuan mipui tana pawimawhzia sawiin, department dangte nena tha taka thawkho tura hma lak a nih theih nan zirchianna kalpui mek a ni tiin, thawktute chu hma lam pan tura inbuatsaih turin a chah a. Sawrkarin cooperation a ngaihpawimawh thu leh Mizoramah Cooperative Movement a awm theih nan ngaihtuahna thar sen a tul thu sawiin, kan ramin hmasawnna a hmuh chhoh zel turah pawh a langsar ber department ni thei turin tan kan lak a tul a ni, a ti bawk.

Agriculture Minister ni bawk Pu P.C. Vanlalruata chuan Agriculture-a hmasawnna tak tak thlen turin Cooperative Society-te nena thawhho a tul thu a sawi a. Thawktu indaihlohnate pawh post ruak hnawh khah chhoh zel tum a ni, a ti a. Sawrkar hna thawhna kawngah thawhhona boruak tha a pawimawh thu tarlangin, department-a thawktu zawng zawngte chu mahni thawhpui theuhte nena innel leh inkawmngeih taka thawk tlang turin a fuih a. Harsatna an neihte inthlahrung hauh lova Minister hnena thlen hreh lo turin a chah bawk a. Cooperation Minister chuan Secretary thar Pu Vinay Kumar IAS, Cooperation department-in a nei chu vanneihthlak a tih thu leh, department hmasawn nana theihtawp chhuaha thawhho a phurawm thu sawiin, Registrar Office atan hmunhma rem zawk ngaihtuah a nih tur thu a sawi bawk.

Pu Vinay Kumar IAS, Secretary, Cooperation Department pawhin thu sawiin, Mizoram khawtlang leh hnam kalphung hrim hrim chu Cooperative Societies nena inmil tak a nih thu a sawi a. Covid-19 hripui avang te’n Cooperative Sector chuan harsatna hrang hrang tawk mah se, Minister thar kaihhruaina hnuaiah department chuan hmalam a pan zel theih a beisei thu a sawi bawk.

Inkawmhona hun hi Pu Robuanga, Joint Registrar chuan kaihruaiin, department-a thawktu hrang hrangte inhmelhriattirna neih a ni a. Pu Lalrinmawia, Assistant Registrar chuan department chanchin tawi, hmalakna kal mekte leh hmachhawpte powerpoint presentation hmangin a sawifiah a; sawihona hun hlawkthlak tak neih a ni.