2575/2025-2026

Dated Aizawl, the 8th December, 2025 : Pu PC Vanlalruata, Minister, Cooperation Department uapna hnuaiah vawiin khan National Cooperative Exports Limited (NCEL) leh Mizoram State Cooperative Marketing & Consumers’ Federation Limited (MIZOFED)-te chuan thawhhona thuthlung Memorandum of Understanding (MoU) an ziak a. Hei hi Mizorama agriculture sector leh a kaihhnawhte’n an thil tharte cooperative sector kaltlanga ram pawna an thawnchhuah theihna tura hmalakna pawimawh tak a ni.

MoU hi Pu Lalhruaitluanga, Managing Director, MIZOFED leh Pu Unupom Kausik, Managing Director, NCEL-te’n pawl pahnih hotute hriatpuinain an hming an ziahhnan a ni.

Thawhhona thuthlung ziahna hunah hian Pu John L.T. Sanga, Registrar of Cooperative Societies chuan kalkhawmte lawmna thu sawiin, he hun pawimawhzia leh NCEL leh MIZOFED-te thawhdunnain Mizorama cooperative society-te tana tun hmaa la hmuh ngai loh remchanna a kawhhmuh tur thu a sawi a. Pu Udit Prakash Rai, Commissioner, Cooperation Department chuan he MoU- in an thil tharte ram pawna thawnchhuak theia a siam avanga Mizorama cooperative-te tana hma hun eng a siamsak dan a sawi bawk a ni. 

Pu Unupom Kausik, MD, NCEL chuan Mizoram agricultural sector-a theihna inphum ru haichhuah tur a tamzia sawiin, NCEL chuan thiamna sang zawk leh midang nena thawhhona a lo neih sate hmanga he theihna inphum ru hi haichhuah ngei a, Mizoram hausakna leh hmasawnna tura thawh ve a tum thu a sawi a. Pu K. Rothangpuia, Chairman, MIZOFED chuan lawmthu sawiin hun a khar a ni.

NCEL hi kum 2023 khan Multi-State Cooperative Societies Act, 2002 hnuaia din niin, India rama cooperative sector thil siamchhuah thawnchhuah kawnga hmahruaitu a ni a. GCMMF (AMUL), IFFCO, KRIBHCO, NAFED leh NCDC te leh cooperative pawl lian dangte hman lar niin, NCEL hi cooperative- te thil siamchhuah ram pawna thawnchhuah lamah a bul atanga a tawp thleng - lakkhawm (procurement), sawngbawl (processing), chhinchhiahna siam (branding) leh zawrhchhuah (marketing) -  kalpui tura thuneihna pek a ni.

MIZOFED hi Assam Cooperative Societies Act, 1949 hnuaiah kum 1981 khan din niin, Mizorama cooperative inzawmkhawmna sang ber a ni a. Sawrkar hnuaia pawl pawimawh tak niin, district zawng zawngah POL, LPG leh mipui mamawh phuhruk leh sem hna a thawk a ni.

Thawhhona thuthlung hi kum thum chhung nung tur a ni a, a tum bulpui berte chu a hnuaia tarlante hi a ni:

•    Mizorama cooperative society-te atanga ram pawna thawnchhuah tlak agriculture leh a kaihhnawih thilte zawn a, theh lar.

•    MIZOFED nena inthlunzawm cooperative-te tana NCEL-in ram chhung leh pawna a thawhpui sate nena tlang taka sumdawnna kawnga inzawmna siam.

•    Ram pawna thawnchhuah tlak thilte NCEL-in a lakkhawm a, a zawrhchhuah theih nana puih.

•    Mizorama thil siamchhuahte tana sumdawnna tih hmang inkhaidiat (value chain) ngialnghet leh hlawkthlak siam.

•    Trade fair-ahte tangruala tel a, theihna leh thiamna tihhmasawn (capacity building and technical guidance) kawngah te leh certification tul ang neih kawngah te puih.

He thawhdunna hian Mizoram tharchhuah pawimawh zualte (flagship produce) – Sawhthing, Aieng, Hmunphiah leh Hmarcha te theh larna kawngah nasa takin kawng a sial dawn a. NCEL thiamna leh thawhpui neih sate hmangin he’ng thlai tharchhuahte hi ram pawna zawrhchhuah an nih chuan Mizoram tan hmasawnna tam tak a thlen dawn a ni.

•    Thlai thar hralhna hmun zau zawk pawh leh sum hman sa hmuh let theihna: Loneitute leh cooperative-te’n NCEL-in ram pawna thil hralh tur a thawnchhuahna ruangam tlang takin an hmang thei ang a, zuarchhawngtute kalkanin khawvel pum huap sumdawnna hmunah man man zawkin an tharchhuahte an zuar thei dawn a ni.

•    Hlutna belhchhah leh quality tihthat: NCEL chuan tharchhuah dan, thlai seng hnua enkawl dan, sawngbawl dan, tualto thilte khawvel pum ngaiha quality tha leh fun dan tha bik duan lamah a pui dawn a ni.

•    Eizawnna ngialnghet: An thlai tharte ram pawna hralh tura thawnchhuah reng a nih theih chuan loneitute’n lakluh tura an inbeisei ang zat an lalut thei ang a, thlai chin dan ngialnghet zawk an kalpui thei ang a, thingtlang economy a tithang bawk ang.

•    Khawvel pumin ‘Mizoram’ an hmelhriat ang: Zawrhchhuah dan leh chhinchhiahna siam lama tan lakna chuan Mizoram atanga hmuihmer bawlhlo leh thlai organic leh quality thate chu nihna langsar a neihtir ang a, ram pawnah pawh duh rawn leh hriat hlawh an ni thei dawn a ni.

•    Thiamna leh hmunhmarel lama hmasawnna: He thawhhonaah hian loneitute zirtirna pek leh sum leh hmanruate tangkai leh hlawk zawka hman (resource mobilisation) a tel a. Chu chuan Mizorama thlai lama sumdawnna tih hmang inkhaidiat (agricultural value chain) a tichangtlung sauh dawn a ni.