1666/2026-2027

Dated Khawzawl the 5th August, 2026 : Vawiin khan Khawzawl District Cooperation Office hawnna leh District Hospital Ambulance hlanna leh flag-off na chu Cooperation Minister Pu PC Vanlalruata’n Khawzawl DC Office Building-ah a nei.

District Cooperative Office hawnna DC Conference Hall, Khawzawl a, Programme buatsaihah Minister Pu PC Vanlalruata chuan thu sawiin Khawzawl District Cooperative Office hawn a ni ta chu lawmawm a tih thu leh hawn a nih theihna tura hnarkaitu leh hmalatute zawng zawng chungah lawmthu a sawi a, District thar zingah hei hi a hmasa ber a nih thu leh tunah hian DC Office, Khawzawlah bultanin, DCO Champhai in a vil la ngai mahse nakinah chuan Office hranpa nei a, thawktu pawh indaih zawk a thuam chhoh zel an tum tih a sawi.

Minister chuan Cooperative Movement lian zawk Mizoramah kalpui an duh thu leh hei hi Mizoram Economy pawhin a thatpui an beisei tih sawiin Cooperative Movement chungchangah pawh thalaite zingah Campaign nasa takin an nei chho tih a sawi a. NABARD te nen pawh Cooperative Movement ti chak tur hian tan la hovin NABARD hian kumtin sum fai nuai tam tak Cooperative Society-te Training-na tur leh Cooperative Movement tihchakna turin an pe a, PACS leh MPACS te pawh enkawlpuiin a tul angin Farmers-te Handholding an kalpui tih a sawi.
Minister chuan Mizoramah hian Cooperative Society kan neih zingah tam tak chu nung tha tawh lo, kal ngaihna pawh hre lo an ni a. Hengte hi tih that leh thuam that a, Training mumal tak pe a, Society changtlung taka hlan chhoh an tum tih a sawi a. Mizoramah hian Farmers ten kawng hrang hrangah ei an zawng a, anmahni enkawl a, kaihruai tur hian Cooperative Movement tihchak hi a pawimawh tih a sawi a. Cooperative Movement a chak a, a hlawhtling chuan Farmers-te pawhin entawnin an tichho ang a, Mizoramah Cooperative Movement lianpui mai a kal chhoh chuan ram Economy pawhin nasa takin hma a sawn dawn niin Sawrkarin a hria tih a sawi bawk a ni.

Vawiin Programme hman hi Pu John L.T. Sanga, Registrar of Cooperative Societies in a kaihruai a. He hunah hian Khawzawl District Bawrhsap Pu Vanlalthiana bakah Department leh Society lam aiawhten thu an sawi a, zaithiam zai ngaihthlak a ni bawk a ni.

District Cooperative Office hawnna neih zawh hian DC Office kawtah District Hospital tan ambulance hlanna leh Flag-off na hun tawi hman nghal niin Pu K.anlalthiana, DC Khawzawlin a kaihhruaia Pu Chandrakant Bagoria SDC(S) in report tawi pein Minister chuan Document hlanna leh Ambulance flag-off na hun a hmang a ni.

Khawzawl hi district thar a nih angin healthcare infrastructure mamawhna a nasa hle a, Emergency transportation tha zawk leh damlo referral service tha zawk neih a tulzia ngaihtuahin MP leh District Administration hmalaknain NHIDCL ah thlenniin 15 lakh saction hmuh a ni a. a tul ang angte tihfel a nih hnuin Ambulance hi Mana Motors, Aizawl atangin lei a ni.

Lirthei, insurance, registration leh thil tul hrang hrang siamna atana sum hman zawng zawng chu nuai 13.87 vel a niin balance nuai 1.13 vel a la awm a ni. Balance la awm hi ambulance tana emergency medical equipment pawimawh tak tak lei nan hman phalna dil leh mek niin phalna hi pek a nih chuan Portable ECG machine, battery backup system leh anti-choking device etc. lei nan ruahhamn a ni a, phalna pek a nih loh chuan balance chu NHIDCL hnenah pek kir leh a ni ang.