Cooperation Minister Pu Lalrinmawia Ralte hovin vawiin khan Vanapa Hall-ah All India Cooperative Week vawi 63-na lawmna programme neih a ni.
Minister Pu Lalrinmawia Ralte chuan Mizoram mipui za zela 60 atanga 70 laiin an chhawr tangkai theih tur Cooperative sector tangkaina inzirtir nasat leh zual a ngai a ni, a ti. Public leh private sector in hma sawn mahse cooperative sector-ah hma kan sawn loh chuan hmasawnna inkhairuallo leh khingbai a ni, Cooperative Minister chuan a ti a. A chhawr tangkaitu tur mipuiin cooperative movement tangkaizia leh a hlutna an hre lova, ram leh khawtlang hruaitute, mipui mimir kan zavaiin zirtir kan ngai a ni, a ti. Cooperative movement kaltlang hian hmasawnna tlo, rintlak leh nung reng a neih theih tiin sawrkar atanga sum hmuh beisei avang ringawta society leh self help group din chingte avanga society tam tak neih teuh ai chuan hmasawn tum, taima leh thahnemngai tak tak te intelkhawmna society tlemte neih a tha zawk, Pu Lalrinmawia Ralte chuan a ti bawk.
Khuallian Pu Lalrinmawia Ralte hian All India Cooperative Week vawi 63-na puala siam Cooperative Tlangau Special Issue a tlangzarh nghal bawk a ni.
Kum 1953 khan All India Cooperative Union, tuna National Cooperative Union of India (NCUI) lo ni ta chuan cooperative sector a thawktute intuaitharna leh mipui hmaa an inphochhuahna hun remchang atan All India Cooperative Week hi hman thin ni se tiin an rel a. Cooperation movement a tui em em, India Prime Minister hmasa ber Jawaharlal Nehru piancham denchhenin November 14 atanga tanin Cooperative Week hi hman thin a ni. India ramah chuan cooperative movement hi kum 1904 khan lakluh tan a ni a. Thingtlang hmun kilkhawr ber pawh credit service pe thei tura siam niin ram ei leh bar intodelh nan cooperative society hi sengluh a ni. Mizoramah Cooperative Society 1400 bawr vel an awm a. Society hnuaiah hian hnathawktu mi 3000 chuang an awm.
Cooperative Week lawmna programme hi Mizoram State Cooperative Union (MSCU) President Pu Lianthangpuia’n a kaihruai a. Pi Rothangliani Ralte, CDO, MSCU Ltd. leh Pi T.C Lalchawimawii FEO, MCSU Ltd. te chuan Mizoram Governor, Cooperation Minister, Mizoram Chief Secretary leh MSCU President te thuchah an chhiarchhuak a. Registrar of Cooperative Society Pu Sangdingliana chuan lawmthu sawiin hun hnung a khar a ni.
